Nauugnay na mga Salita ng Diyos:

Ang Diyos na nagkatawang-tao ay tinatawag na Cristo, at kaya ang pagtawag na Diyos sa Cristo na kayang magkaloob ng katotohanan sa mga tao ay hindi kalabisan kahit kaunti. Ito ay dahil taglay Niya ang diwa ng Diyos, at taglay Niya ang disposisyon ng Diyos, at ang karunungan ng gawain ng Diyos, na hindi kayang abutin ng tao. Ang mga tumatawag sa sarili nila na mga cristo, subalit hindi naman kayang gawin ang gawain ng Diyos, ay mga impostor. Hindi lamang pagpapamalas ng Diyos sa lupa si Cristo, kundi ang partikular din na katawang-taong tinataglay ng Diyos habang ginagawa Niya ang Kanyang gawain sa lupa at tinatapos Niya ang Kanyang gawain sa gitna ng tao. Hindi maaaring palitan ang katawang-taong ito ng kahit na sinumang tao, kundi isa itong katawang-tao na kayang pasanin nang husto ang gawain ng Diyos sa lupa, at na kayang maipahayag ang disposisyon ng Diyos, na kayang sapat na katawanin ang Diyos, at na kayang magbigay ng buhay sa tao. Sa malao’t madali, babagsak ang lahat ng nagpapanggap na Cristo, sapagkat bagama’t sinasabi nilang sila si cristo, hindi nila taglay ang diwa ni Cristo. Kaya naman sinasabi Ko na hindi kayang tukuyin ng tao ang pagiging tunay ni Cristo, kundi sinasagot at pinagpapasyahan ito ng Diyos Mismo.

—Ang Salita, Vol. I. Ang Pagpapakita at Gawain ng Diyos. Tanging si Cristo ng mga Huling Araw ang Makapagbibigay sa Tao ng Daan ng Buhay na Walang Hanggan

Siya na Diyos na nagkatawang-tao ay nagtataglay ng diwa ng Diyos, at Siya na Diyos na nagkatawang-tao ay nagtataglay ng pagpapahayag ng Diyos. Dahil ang Diyos ay naging tao, dinadala Niya ang gawaing nilalayon Niyang gawin, at dahil Siya ang Diyos na nagkatawang-tao, ipinapahayag Niya kung ano Siya, at nagagawa Niyang ihatid sa tao ang katotohanan, pagkalooban ito ng buhay, at ituro dito ang daan. Ang laman na walang diwa ng Diyos ay tiyak na hindi ang Diyos na nagkatawang-tao; walang duda ito. Kung nilalayon ng tao na suriin kung ito ba ang nagkatawang-taong laman ng Diyos, kailangan itong tukuyin ng tao mula sa disposisyon na ipinapahayag ng Diyos at sa mga salitang sinasambit ng Diyos. Ibig sabihin, para matukoy kung ito nga ba ang nagkatawang-taong laman ng Diyos o hindi, at kung ito nga ba ang tunay na daan o hindi, kailangang makilala ang kaibhan batay sa Kanyang diwa. Kaya nga, ang susi sa kung ito ba o hindi ang laman ng Diyos na nagkatawang-tao ay nakasalalay sa Kanyang diwa (Kanyang gawain, Kanyang mga salita, Kanyang disposisyon, at marami pang ibang aspekto), sa halip na sa panlabas na anyo. Kung sinusuri ng tao ang panlabas na anyo lamang ng Diyos, at dahil dito ay hindi niya napapansin ang diwa ng Diyos, ipinapakita nito na ang tao ay hangal at mangmang.

—Ang Salita, Vol. I. Ang Pagpapakita at Gawain ng Diyos. Paunang Salita

Bagama’t nagagawa ni Cristo sa lupa na gumawa sa ngalan ng Diyos Mismo, hindi Siya pumaparito na may layuning ipakita sa lahat ng tao ang wangis Niya sa katawang-tao. Hindi Siya pumaparito upang mamasdan Siya ng lahat ng tao; pumaparito Siya upang tulutan ang tao na maakay ng kamay Niya, at sa gayon ay makapasok ang tao sa bagong kapanahunan. Ang katungkulan ng katawang-tao ni Cristo ay para sa gawain ng Diyos Mismo, na ibig sabihin, para sa gawain ng Diyos sa katawang-tao, at hindi upang bigyang-kakayahan ang tao na lubusang maunawaan ang diwa ng katawang-tao Niya. Paano man Siya gumagawa, wala sa ginagawa Niya ang lumalampas sa matatamo ng katawang-tao. Paano man Siya gumagawa, ginagawa Niya ito sa katawang-tao na may normal na pagkatao, at hindi Niya lubos na ibinubunyag sa tao ang totoong mukha ng Diyos. Dagdag pa rito, ang gawain Niya sa katawang-tao ay hindi kailanman kasingsobrenatural o hindi masusukat tulad ng maiisip ng tao. Bagama’t kinakatawan ni Cristo ang Diyos Mismo sa katawang-tao at isinasakatuparan mismo ang gawain na dapat gawin ng Diyos Mismo, hindi Niya ikinakaila ang pag-iral ng Diyos sa langit, ni ipinahahayag nang may pagpapasikat ang sarili Niyang mga gawa. Sa halip, nananatili Siyang nakatago, mapagpakumbaba, nasa loob ng Kanyang katawang-tao. Bukod kay Cristo, yaong mga huwad na umaangking sila ay cristo ay hindi nagtataglay ng Kanyang mga katangian. Kapag inihambing sa mayabang at nagtataas-sa-sariling disposisyon ng mga huwad na cristong iyon, nagiging malinaw kung anong uri ng katawang-tao ang tunay na Cristo. Habang ang isang tao ay mas huwad na cristo, mas ipangangalandakan niya ang sarili niya, at mas may kakayahan siyang gumawa ng mga tanda at mga kababalaghan upang ilihis ang tao. Walang mga katangian ng Diyos ang mga huwad na cristo; hindi nadudungisan si Cristo ng kahit anong sangkap na pagmamay-ari ng mga huwad na cristo. Nagkakatawang-tao lamang ang Diyos upang tapusin ang gawain ng katawang-tao, hindi para lamang pahintulutang makita Siya ng tao. Sa halip, hinahayaan Niyang ang gawain Niya ang magpatunay ng Kanyang pagkakakilanlan, at hinahayaan yaong ibinubunyag Niya ang magpatunay sa Kanyang diwa. Ang diwa Niya ay hindi walang batayan; hindi kinamkam ng Kanyang kamay ang pagkakakilanlan Niya; itinatakda ito sa pamamagitan ng Kanyang gawain at Kanyang diwa.

—Ang Salita, Vol. I. Ang Pagpapakita at Gawain ng Diyos. Ang Diwa ni Cristo ay Pagpapasakop sa Kalooban ng Ama sa Langit

Kung, sa panahon ngayon, may lumitaw na isang tao na kayang magpakita ng mga tanda at kababalaghan, magpalayas ng mga demonyo, magpagaling ng maysakit, at magsagawa ng maraming himala, at kung sinasabi ng taong ito na siya si Jesus na naparito, kung gayon, ito ay isang impersonasyon ng isang masamang espiritu, ang akto ng isang masamang espiritung gumagaya kay Jesus. Tandaan ito! Hindi inuulit ng Diyos ang parehong gawain. Nakompleto na ang yugto ng gawain ni Jesus, at hindi na muling isasagawa ng Diyos ang yugtong iyon ng gawain. Ang gawain ng Diyos ay hindi umaayon sa mga kuru-kuro ng tao; halimbawa, ipinropesiya sa Lumang Tipan ang pagparito ng isang Mesiyas, at lumabas na si Jesus ang dumating. Sa gayon ay magiging mali na pumarito ang isa pang Mesiyas. Pumarito nang minsan si Jesus, at magiging mali kung pumaritong muli si “Jesus” sa pagkakataong ito. Mayroong isang pangalan para sa bawat kapanahunan, at bawat pangalan ay may paglalarawan ng kapanahunang iyon. Sa mga kuru-kuro ng tao, kailangang laging magpakita ang Diyos ng mga tanda at kababalaghan, kailangang laging magpagaling ng maysakit at magpalayas ng mga demonyo, at kailangang laging maging katulad lamang ni Jesus. Subalit sa pagkakataong ito, hindi talaga ganoon ang Diyos. Kung, sa mga huling araw, nagpakita pa rin ang Diyos ng mga tanda at mga kababalaghan, at nagpalayas pa rin ng mga demonyo at nagpagaling ng maysakit—kung ginawa Niya ang ginawa mismo ni Jesus—uulitin ng Diyos ang parehong gawain, at mawawalan ng kabuluhan o halaga ang gawain ni Jesus. Sa gayon, isinasagawa ng Diyos ang isang yugto ng gawain sa bawat kapanahunan. Kapag natapos na ang bawat yugto ng Kanyang gawain, agad itong sinusubukang gayahin ng masasamang espiritu, at matapos simulang mahigpit na buntutan ni Satanas ang Diyos, nag-iiba ng pamamaraan ang Diyos. Kapag natapos na ng Diyos ang isang yugto ng Kanyang gawain, sinusubukan itong gayahin ng masasamang espiritu. Kailangang maging malinaw sa inyo ang tungkol dito.

—Ang Salita, Vol. I. Ang Pagpapakita at Gawain ng Diyos. Kaalaman sa Kasalukuyang Gawain ng Diyos

May ilang sinasaniban ng masasamang espiritu at malakas na sumisigaw ng, “Ako ang diyos!” Ngunit sa katapusan, sila ay nabubunyag dahil sila ay mali sa kanilang kinakatawan. Kinakatawan nila si Satanas, at hindi sila binibigyang-pansin ng Banal na Espiritu. Gaano mo man itinataas ang iyong sarili o gaano ka man kalakas sumigaw, ikaw ay isang nilikha pa rin at isa na kay Satanas. Kailanman ay hindi Ako sumisigaw ng, “Ako ang Diyos, Ako ang sinisintang Anak ng Diyos!” Ngunit ang gawaing ginagawa Ko ay gawain ng Diyos. Kailangan Ko bang sumigaw? Hindi kailangan ang pagdadakila. Ginagawa ng Diyos Mismo ang Kanyang gawain at hindi kailangan ng Diyos na bigyan Siya ng tao ng isang katayuan o kagalang-galang na titulo: kinakatawan na ng Kanyang gawain ang Kanyang pagkakakilanlan at katayuan. Bago ang Kanyang bautismo, hindi ba’t si Jesus ang Diyos Mismo? Hindi ba’t Siya ang nagkatawang-taong Diyos? Tiyak na hindi maaaring sabihin na naging tanging Anak ng Diyos Siya pagkatapos lamang Niyang mapatotohanan? Wala bang tao na may pangalang Jesus sa matagal na panahon bago Siya nagsimula ng Kanyang gawain? Hindi mo kayang maghatid ng mga bagong landas o kumatawan sa Espiritu. Hindi mo kayang ipahayag ang gawain ng Espiritu o ang mga salita na sinasabi Niya. Hindi mo kayang gawin ang gawain ng Diyos Mismo o iyong sa Espiritu. Ang karunungan, pagiging kamangha-mangha, at pagiging di-maarok ng Diyos, at ang buong disposisyon sa pagkastigo ng Diyos sa tao—lahat ng ito ay higit sa iyong kakayahang magpahayag. Kaya walang saysay na angkinin mo na ikaw ang Diyos; magkakaroon ka lamang ng pangalan ngunit hindi ng diwa. Dumating na ang Diyos Mismo, ngunit walang nakakakilala sa Kanya, gayunman patuloy Siya sa Kanyang gawain at ginagawa ang gayon sa pagkatawan sa Espiritu. Tawagin mo man Siyang tao o Diyos, ang Panginoon o Cristo, o tawagin Siyang kapatid na babae, hindi ito mahalaga. Ngunit ang gawaing ginagawa Niya ay iyong sa Espiritu at kumakatawan sa gawain ng Diyos Mismo. Hindi mahalaga sa Kanya ang pangalan na itinatawag sa Kanya ng tao. Puwede bang madikta ng pangalang iyon ang Kanyang gawain? Anuman ang itawag mo sa Kanya, sa pananaw ng Diyos, Siya ang nagkatawang-taong laman ng Espiritu ng Diyos; kinakatawan Niya ang Espiritu at sinasang-ayunan Siya ng Espiritu. Kung hindi mo kayang buksan ang landas para sa isang bagong kapanahunan, o tapusin ang lumang kapanahunan, o magbukas ng isang bagong kapanahunan o gumawa ng bagong gawain, hindi ka maaaring tawaging Diyos!

—Ang Salita, Vol. I. Ang Pagpapakita at Gawain ng Diyos. Ang Hiwaga ng Pagkakatawang-tao (1)

Sanggunian na mga Sipi ng Sermon at Pagbabahagi:

Kung may isang tao na nililito ang mga piniling tao ng Diyos at sinasabing siya si Cristo, ang katawan ng Diyos na naging tao, dapat nating tingnan ang kanyang diwa at pagpapahayag, ang kanyang gawain at mga salita, at ang kanyang ipinapakitang disposisyon, para matiyak natin kung siya nga si Cristo. Para makita ang kanyang diwa mula sa mga pangunahing aspetong ito, matitiyak natin na siya nga ang Diyos na nagkatawang-tao. Una, mula sa aspeto ng gawain, dapat nating makita na kung ang Kanyang gawain ay gawain ng Diyos, maipapahayag Niya ang salita ng Diyos, kung anong mayroon at kung ano ang Diyos, at ang matuwid na disposisyon ng Diyos. Kung ito ay gawain ng tao, makakapagsalita lamang siya tungkol sa lahat ng kung anong mayroon at kung ano ang tao, karanasan at pag-unawa ng tao. Hindi siya makapagsasalita ng tungkol sa lahat ng kung anong mayroon at kung ano ang Diyos, sa gawain, kahilingan, at disposisyon ng Diyos, lalo pa ang tungkol sa plano ng pamamahala ng Diyos at misteryo ng Diyos. Ikalawa, mula sa aspeto ng salita, mayroong malaking pagkakaiba ang salita ng Diyos at salita ng tao. Kinakatawan ng salita ng Diyos ang lahat ng kung anong mayroon at kung ano ang Diyos, at ang salita ng tao ay kinakatawan ang lahat ng kung anong mayroon at kung ano ang tao. Kinakatawan ng salita ng Diyos ang disposisyon ng Diyos. Kinakatawan ng salita ng tao ang pagkatao ng tao. Ang salita ng Diyos ay ang katotohanan. Ang salita ng tao ay hindi ang katotohanan. Hindi ito nabibilang sa katotohanan. Ikatlo, mula sa aspeto ng disposisyon, kayang ipahayag ng gawain ng Diyos ang disposisyon ng Diyos. Ang gawain ng tao ay hindi kayang ipahayag ang disposisyon ng Diyos; kaya lamang nitong ipahayag ang pagkatao ng tao. Ano ang mayroon sa pagkatao ng tao? Mayroon ba itong anumang katuwiran, kamahalan, bangis o ang katotohanan? Wala sa pagkatao ng tao ang anuman sa kung anong mayroon at kung ano ang Diyos. Kaya ang gawain ng tao ay hindi kinapapalooban ng kahit katiting na disposisyon ng Diyos. Napakadaling husgahan mula sa mga aspetong ito kung salita ba ito ng Diyos o salita ng tao, gawain ba ng Diyos o gawain ng tao. Kung hindi masasabi ng tao ang kaibahan mula sa mga aspetong ito, madali para sa kanya na malito ng mga huwad na Cristo at mga anticristo. Kung masasabi mo ang pagkakaiba mula sa tatlong aspetong ito, matutukoy mo kung sino ang Diyos na nagkatawang-tao at kung sino ang hindi. Ang gawain, ang mga salita at ang disposisyon—ito ang pinakatumpak na paraan para masabi ang pagkakaiba mula sa tatlong aspetong ito, at hindi manghusga sa pamamagitan ng panlabas na mga anyo.

—Mga Sermon at Pagbabahagi Tungkol sa Pagpasok sa Buhay