1 Nanggagaling ang kalikasan ng tao sa kaluluwa, hindi sa laman. Tanging ang kaluluwa ng bawat tao ang nakakaalam kung paano nila naranasan ang mga panunukso, pagpapahirap, at katiwalian ni Satanas. Hindi malalaman ng laman ng tao ang mga bagay na ito. Kaya, di-sinasadyang nagiging padilim nang padilim, parumi nang parumi, at pasama nang pasama ang sangkatauhan, habang palaki nang palaki ang agwat sa pagitan Ko at ng tao, at padilim nang padilim ang buhay para sa sangkatauhan. Ang mga kaluluwa ng sangkatauhan ay hawak ni Satanas sa mga kamay nito, kaya, siyempre, ang laman ng tao ay nasakop na rin ni Satanas. Paanong hindi kakalabanin ng laman na tulad nito at ng sangkatauhang ito ang Diyos? Paano sila magiging likas na kaayon Niya? Itinapon Ko sa hangin si Satanas dahil ipinagkanulo Ako nito. Paano, kung gayon, mapapalaya ang mga tao sa pagkakasangkot nila? Ito ang dahilan kung bakit ang pagkakanulo ay kalikasan ng tao.

2 Hindi mahalaga kung gaano katagal ka nang tagasunod ng Diyos—kalikasan mo pa ring ipagkanulo ang Diyos. Sa ibang salita, nasa kalikasan ng tao na ipagkanulo ang Diyos, dahil hindi kaya ng mga taong magkamit ng lubos na pagkamaygulang sa mga buhay nila, at maaari lang magkaroon ng mga relatibong pagbabago sa mga disposisyon nila. Gaano man kamaygulang ang buhay mo, gaano man kalalim ang mga karanasan mo, gaano man kalaki ang kumpiyansa mo, saan ka man ipinanganak at saan ka man papunta, malamang na ibubunyag ng kalikasan mong ipagkanulo ang Diyos ang sarili nito anumang oras at saanmang lugar. Ang nais sabihin ng Diyos sa bawa’t isang tao ay ito: Katutubong kalikasan ng bawat isang tao ang ipagkanulo ang Diyos. Ang intensyon ng Diyos sa pagpapahayag ng mga salitang ito ay hindi upang humanap ng dahilan upang alisin o kondenahin ang sangkatauhan, kundi ang gawin ang mga taong mas may kamalayan sa kalikasan ng tao, upang maingat silang makapamuhay sa harap ng Diyos sa lahat ng oras upang matanggap ang patnubay Niya, na pipigil sa kanilang maiwala ang presensiya ng Diyos at tumapak sa landas na wala nang balikan.

Hango sa Ang Salita, Vol. I. Ang Pagpapakita at Gawain ng Diyos. Isang Napakaseryosong Problema: Pagtataksil 2