Dumating na ang papuri sa Sion at lumitaw na ang tirahan ng Diyos. Ang maluwalhating banal na pangalan ay pinupuri ng di-mabilang na hinirang na mga tao ng Diyos at lumalaganap ito. Oh, Makapangyarihang Diyos! Ang Pinuno ng sansinukob, ang Cristo ng mga huling araw—Siya ang nagniningning na Araw na sumikat sa buong sansinukob, sa itaas ng kapita-pitagan at marilag na Bundok ng Sion …

Makapangyarihang Diyos! Kami ay tumatawag sa Iyo nang may kagalakan; sumasayaw at umaawit kami. Tunay na Ikaw ang aming Manunubos, ang dakilang Hari ng sansinukob! Ginawa Mo nang ganap ang isang grupo ng mga mananagumpay at natupad Mo na ang plano ng pamamahala ng Diyos. Dadaloy ang di-mabilang na hinirang na mga tao ng Diyos sa bundok na ito. Luluhod sa pagsamba ang di-mabilang na hinirang na mga tao ng Diyos sa harap ng trono! Ikaw ang nag-iisa at tanging tunay na Diyos at karapat-dapat Ka sa kaluwalhatian at karangalan. Lahat ng kaluwalhatian, papuri, at awtoridad ang mapasa-trono! Dumadaloy mula sa trono ang bukal ng buhay, na dumidilig at nagpapakain sa lahat ng tao ng Diyos. Nagbabago ang buhay sa bawat araw; sinusundan tayo ng bagong liwanag at mga paghahayag, at patuloy tayong nagkakamit ng mga bagong kabatiran tungkol sa Diyos. Sa pamamagitan ng karanasan, dumarating ang lubos na katiyakan tungkol sa Diyos. Ang Kanyang mga salita ay patuloy na nagpapakita, nagpapakita sa kalooban ng mga tamang tao. Tunay ngang labis tayong pinagpala! Kaharap natin ang Diyos bawat araw, nakikipagbahaginan tayo sa Diyos sa lahat ng bagay, at hinahayaan natin ang Diyos na maghari sa lahat ng bagay. Pinagbubulay-bulayan nating mabuti ang salita ng Diyos, pumapayapa ang ating puso sa Diyos—sa paraang ito, lumalapit tayo sa harapan ng Diyos, at doon natin natatanggap ang Kanyang pagtanglaw. Sa bawat araw, ang buhay, mga kilos, salita, kaisipan, at ideya ay naisasabuhay sa loob ng salita ng Diyos, at mayroong pagkilatis sa lahat ng oras. Ang salita ng Diyos ang gumagabay sa sinulid papasok sa butas ng karayom; nang di-inaasahan, nalalantad ang mga bagay na nakatago sa ating kalooban nang sunod-sunod. Ang pakikipagbahaginan sa Diyos ay hindi maaaring maantala; inilalantad ng Diyos ang mga kaisipan at ideya. Sa bawat sandali, namumuhay tayo sa harap ng luklukan ni Cristo, at nararanasan natin ang paghatol sa harap ng luklukan ni Cristo. Nananatiling sakop ni Satanas ang bawat bahagi sa loob ng ating katawan. Ngayon, upang mabawi ang pagkahari ng Diyos, kinakailangang linisin ang Kanyang templo. Upang ganap na masakop ng Diyos, kailangang maranasan ang isang buhay-at-kamatayang pakikibaka. Kapag naipako na sa krus ang dating sarili, saka lamang maghahari ang buhay ng muling nabuhay na Cristo.

Nagsisimula ngayon ng isang pagsalakay ang Banal na Espiritu sa bawat sulok natin upang makidigma para mabawi tayo! Basta’t kusang-loob nating itatatwa ang ating sarili at handa tayong makipagtulungan sa Diyos, tiyak na tatanglawan at lilinisin tayo ng Diyos sa ating kalooban sa lahat ng oras, at babawiing muli yaong nasakop na ni Satanas, nang sa gayon ay magawang ganap tayo ng Diyos sa lalong madaling panahon. Huwag tayong mag-aksaya ng panahon—mamuhay sa bawat sandali sa loob ng salita ng Diyos. Maitayo na kasama ng mga banal, madala sa kaharian, at makapasok sa kaluwalhatian kasama ng Diyos.