Alam mo ba na nauubos na ang oras? Dahil dito, sa maikling panahon, dapat kang umasa sa Akin para iwaksi ang lahat sa iyo na di-kaayon ng Aking disposisyon: ang iyong kamangmangan, pagiging mabagal tumugon, malabong pag-iisip, pagiging malambot ng puso, mahinang paninindigan, kabalighuan, pagkakaroon ng napakatitinding damdamin, at pagiging magulo ng isip at kawalan ng pagkilatis. Dapat iwaksi ang lahat ng ito sa lalong madaling panahon. Ako ang Makapangyarihang Diyos! Hangga’t handa kang makipagtulungan sa Akin, kaya Kong pagalingin ang lahat ng iyong karamdaman. Ako ang Diyos na nagmamasid sa pinakakaibuturan ng puso ng mga tao; alam Ko ang lahat ng iyong karamdaman at ang mga bahagi mo na may depekto. Ang mga ito ang mga bagay na pumipigil sa iyo sa paglago sa buhay, at dapat iwaksi ang mga ito sa lalong madaling panahon. Kung hindi, hindi maisasakatuparan sa iyo ang Aking kalooban. Dapat kang umasa sa Akin para iwaksi ang lahat ng tinatanglawan Ko para sa iyo, palaging mamuhay sa pamamagitan Ko, lumapit sa Akin, at sa lahat ng iyong kilos at gawa ay dapat na naroon ang Aking wangis. Mas madalas kang makipagbahaginan sa Akin tungkol sa mga hindi mo nauunawaan, at ituturo Ko kung paano ka makasusulong. Kung hindi mo nauunawaan, huwag kang kumilos nang arbitraryo, kundi maghintay ka sa Aking panahon. Panatilihin mo ang isang matatag na disposisyon at huwag kang maging pabago-bago; dapat palagi kang magkaroon ng pusong may takot sa Akin. Ang ginagawa mo sa harap Ko at nang palihim ay dapat kapwa alinsunod sa Aking mga layunin. Alang-alang sa Akin, huwag kang maging maluwag kaninuman, kahit asawa mo pa, o kahit pamilya mo pa—hindi ito katanggap-tanggap, gaano man kalapit na kamag-anak ang isang tao sa iyo. Dapat kang kumilos batay sa katotohanan. Kung mahal mo Ako, tiyak na pagkakalooban kita ng malalaking pagpapala. Hindi Ako magpaparaya sa sinumang lumalaban. Mahalin mo ang Aking minamahal, at kamuhian mo ang Aking kinamumuhian. Huwag mong bigyang-pansin ang sinumang tao o anumang pangyayari o bagay. Sa loob ng iyong espiritu, dapat mong makita nang malinaw ang mga taong ginagamit Ko; dapat kang higit pang makisalamuha sa mga espirituwal na tao. Huwag kang maging hangal—dapat kang magkaroon ng pagkilatis. Ang trigo ay palaging magiging trigo, at ang mga pansirang damo ay hindi kailanman lalago bilang trigo—dapat mong tumpak na matukoy ang iba’t ibang uri ng mga tao. Dapat kang maging labis na maingat sa iyong pananalita, at mag-ingat sa iyong mga hakbang, at kumilos nang alinsunod sa Aking mga layunin. Maingat mong pagbulayan ang lahat ng salitang ito. Dapat mong iwaksi ang iyong paghihimagsik sa lalong madaling panahon at dapat kang maging angkop para sa paggamit Ko, upang mabigyang-kasiyahan mo ang Aking puso.