Muli kayong dinala ng gawain ng Banal na Espiritu sa isang bagong langit at isang bagong lupa. Ang lahat ng bagay ay ginagawang bago, ang lahat ng bagay ay nasa Aking mga kamay, at ang lahat ng bagay ay nagsisimulang muli nang buong lakas! Kung huhusgahan ayon sa mga kuru-kuro ng tao, hindi ito mauunawaan o maipapaliwanag, pero ito ay Ako mismo na gumagawa, at nasa loob nito ang Aking karunungan. Samakatwid, dapat bitiwan na lang ninyo ang lahat ng inyong kuru-kuro at pananaw, kumain at uminom na lang, magpasakop sa gitna nito, at huwag magkaroon ng anumang pag-aalinlangan. Dahil gumagawa Ako sa ganitong paraan, papasanin Ko ang isang sagradong responsabilidad. Sa katunayan, hindi ito usapin ng kung ano ang dapat gawin ng mga tao; sa halip, ito ay paggawa ng Diyos ng mga mahimalang bagay, inihahayag ang Kanyang pagkamakapangyarihan-sa-lahat. Hindi pinapahintulutan ang mga tao na magmalaki maliban na lang kung ipinagmamalaki nila ang Diyos. Kung hindi, magdurusa ka ng kawalan. Iniaangat ng Diyos ang mga nangangailangan mula sa alikabok; itataas ang mga hamak. Gagamitin Ko ang Aking sari-saring karunungan para pamahalaan ang pansansinukob na iglesia, para pamahalaan nang maayos ang di-mabilang na mga bansa at ang di-mabilang na hinirang na mga tao Ko, para silang lahat ay nasa loob Ko, at para kayong lahat ay makapagpasakop sa Akin sa iglesia. Iyong mga hindi nagpasakop noon ay dapat na maging mapagpasakop ngayon sa harap Ko; kayong lahat ay magpapasakop sa isa’t isa, magpaparaya sa isa’t isa, magkakaisa sa buhay sa isa’t isa, magmamahalan sa isa’t isa, kukunin ang mga kalakasan ng isa’t isa para punan ang sarili ninyong mga pagkukulang, at makikipagtulungan sa paglilingkod sa Akin. Sa ganitong paraan maitatayo ang iglesia, at walang magiging pagkakataon si Satanas para manamantala. Saka lamang hindi mabibigo na matupad ang Aking plano ng pamamahala. Hayaan ninyong bigyan Ko kayo ng isa pang paalala rito. Huwag mong hayaang lumitaw ang mga maling pagkaunawa sa iyo dahil ang kung sinong tao ay ganyan, o kumilos sa ganito-at-ganyang paraan, na nagiging sanhi para mabulok ang iyong espirituwal na kondisyon. Sa tingin Ko, tunay na isa itong bagay na hindi dapat mangyari, at wala itong halaga. Hindi ba’t ang Diyos ang Siyang sinasampalatayanan mo? Hindi ito kung sinong tao lang. Magkakaiba ang mga tungkulin, pero iisa lang ang katawan. Dapat gampanan ng bawat isa sa inyo ang sarili ninyong tungkulin, manatili sa sarili ninyong lugar at gawin ang inyong pinakamakakaya, magbigay ng liwanag na katumbas ng init na mayroon kayo, at hangarin ang pagiging may-gulang sa buhay. Sa gayon ay masisiyahan Ako.

Kailangan lang ninyong payapain ang inyong sarili sa harap Ko, magkaroon ng maraming pagbabahaginan at pakikipag-ugnayan sa Akin, at kapag may mga bagay na hindi ninyo nauunawaan, maghanap nang mas marami, mag-alay ng mga dasal, at maghintay sa Aking panahon. Tingnan nang malinaw ang lahat mula sa espiritu. Huwag kumilos nang padalos-dalos, para maiwasang maligaw ka ng landas. Sa ganitong paraan lamang tunay na magkakaroon ng bunga ang iyong pagkain at pag-inom ng Aking mga salita. Kumain at uminom ng Aking mga salita nang malimit, pagnilayan ang Aking sinabi, bigyang-pansin ang pagsasagawa ng Aking mga salita, at isabuhay ang realidad ng Aking mga salita; ito ang susing isyu. Ang proseso ng pagtatayo ng iglesia ay proseso rin ng paglago sa buhay. Kung ang iyong buhay ay huminto sa paglago, hindi ka maitatayo. Kung aasa ka sa pagiging natural, laman, kasigasigan, mga ambag, o mga kalipikasyon, gaano man kagaling ang mga ito, hindi ka maitatayo. Kailangan mong mabuhay sa loob ng mga salita ng buhay, mabuhay sa loob ng kaliwanagan at pagtanglaw mula sa Banal na Espiritu, alamin ang iyong tunay na kondisyon, at maging isang taong nabago. Kailangan mong magkaroon ng kaparehong kabatiran sa espiritu, magkaroon ng bagong kaliwanagan, at makasabay sa bagong liwanag. Kailangan magawa mong lumapit sa Akin at makipag-ugnayan sa Akin nang walang humpay. Dapat magawa mong ibatay ang iyong mga kilos sa pang-araw-araw na buhay sa Aking mga salita, makayang pangasiwaan nang wasto ang lahat ng uri ng tao, pangyayari, at bagay batay sa Aking mga salita, gawing pamantayan ang Aking mga salita para sa iyong pag-asal sa buhay at mga kilos, at isabuhay ang Aking disposisyon.

Kung ninanais mong maarok at isaalang-alang ang Aking mga layunin, dapat mong bigyang-pansin ang Aking mga salita. Huwag gumawa ng mga bagay nang padalos-dalos. Ang lahat ng hindi Ko sinasang-ayunan ay nagdudulot ng kapahamakan. Tanging ang sinasang-ayunan Ko ang nagdudulot ng pagpapala. Nagsasalita Ako, at ito ay nangyayari; nag-uutos Ako, at ito ay naitatatag. Anuman ang hindi Ko ipinahintulot, hinding-hindi ninyo dapat gawin, para hindi Ako magalit sa iyo; kung magkagayon ay magiging huli na para magsisi!