Kabanata 12
Kung mayroon kang hindi matatag na disposisyon, na nagbabago sa bawat sandali, at kung hindi mo kayang patuloy na sumulong, tiyak na hindi ka iiwan ng Aking pamalo. Kapag pinupungusan ka, kapag nagiging mas mahirap ang kapaligiran, o kapag tumitindi ang pag-uusig, mas lalago ang pagmamahal mo sa Diyos, at titigil ka sa pagkapit sa mundo. Nang walang ibang daan pasulong, lalapit ka sa Akin at magkakaroon ka ng sapat na lakas at sapat na pananalig. Gayunman, sa mas magiginhawang kapaligiran, kikilos ka nang walang direksyon. Kailangan mong pumasok mula sa panig ng pagiging positibo, maging aktibo at huwag maging pasibo. Hindi ka dapat mayanig ng sinumang tao, anumang pangyayari, o bagay, at hindi ka dapat maimpluwensiyahan ng mga pananalita ng sinuman. Kailangan mong magkaroon ng isang matatag na disposisyon; anuman ang sabihin ng mga tao, kailangan mong isagawa kaagad ang nalalaman mong katotohanan. Huwag bumaling sa sinumang tao; palaging taglayin ang paggawa ng Aking mga salita sa loob mo, magawang manindigan sa iyong patotoo sa Akin, at kumilos nang may pagsasaalang-alang sa Aking mga pasanin. Hindi ka dapat pikit-matang sumasang-ayon sa iba nang wala kang sariling mga ideya; sa halip, dapat kang maglakas-loob na manindigan at tumutol sa mga bagay na hindi naaayon sa katotohanan. Kung alam na alam mo na may mali, subalit wala kang lakas ng loob na ilantad ito, hindi ka isang taong nagsasagawa ng katotohanan. May gusto kang sabihin, ngunit hindi ka naglalakas-loob na magsalita nang prangka, kaya nagpapaligoy-ligoy ka at pagkatapos ay binabago mo ang paksa. Ito ay paghahadlang sa iyo ni Satanas sa loob mo, na nagiging dahilan para magsalita ka nang walang anumang epekto at hindi mo magawang magtiyaga hanggang katapusan. May takot pa rin sa puso mo, at hindi ba ito ay dahil may mga ideya ni Satanas sa puso mo?
Ano ang isang mananagumpay? Ang mabubuting sundalo ni Cristo ay kailangang maging matapang at sumandig sa Akin upang maging malakas sa espirituwal; kailangan nilang magsikap na maging mga mandirigma sa digmaan at labanan si Satanas hanggang kamatayan. Kailangan mong manatiling gising palagi, kaya sinasabihan kita na aktibong makipagtulungan sa Akin sa bawat sandali at magawang lumapit sa Akin. Kung, anumang oras at sa anumang sitwasyon, kaya mong manatiling tahimik sa Aking harapan, sumunod sa Aking mga salita, at tumuon sa Aking mga salita at kilos, hindi ka matatangay at mawawalan ng paninindigan. Anuman ang matanggap mo na mula sa loob Ko ay maaaring isagawa. Bawat isa sa Aking mga salita ay nakatutok sa iyong kalagayan, at tumatagos sa puso mo. Kahit na hindi kumbinsido ang bibig mo, ang puso mo ay dapat maging kumbinsido. Kung sisiyasatin mo ang Aking mga salita, ikaw ay hahatulan. Ibig sabihin, ang Aking mga salita ang katotohanan, ang buhay, at ang daan; ang mga ito ay isang matalas na tabak na magkabila ang talim, at kaya ng mga itong magapi si Satanas. Yaong mga nakauunawa at may daan para maisagawa ang Aking mga salita ay pinagpapala, at yaong mga hindi nagsasagawa ng mga ito ay siguradong hahatulan; totoong-totoo ito. Ngayon, lumawak na ang saklaw ng Aking hinahatulan: Hindi lamang yaong mga nakakakilala sa Akin ang hahatulan sa Aking harapan, kundi sasapit din ang paghatol sa mga hindi nananampalataya sa Akin at ginagawa ang lahat upang labanan at hadlangan ang gawain ng Banal na Espiritu. Makikita ng lahat ng nasa Aking harapan na sumusunod sa Aking mga yapak na ang Diyos ay isang nanglalamon na apoy! Ang Diyos ay pagiging kapita-pitagan! Nagsasagawa Siya ng paghatol, hinahatulan sila hanggang sa punto ng kamatayan. Iyong mga nasa iglesia na hindi nagbibigay-pansin sa pagsunod sa gawain ng Banal na Espiritu, iyong mga gumagambala sa gawaing iyon, iyong mga nagpapasikat, iyong may mga hindi tamang intensiyon at layon, iyong mga hindi maayos na kumakain at umiinom ng mga salita ng Diyos, iyong mga magulo ang isip at madaling magduda, iyong mga sumisiyasat sa gawain ng Banal na Espiritu—sasapit ang mga salita ng paghatol sa mga taong ito anumang oras. Ang lahat ng kilos ng mga tao ay isa-isang ihahayag. Sinisiyasat ng Banal na Espiritu ang pinakakaibuturan ng mga puso ng mga tao. Huwag kang maging walang-ingat; mag-ingat kang mabuti at maging mapagbantay. Huwag bulag na kumilos nang nagsasarili. Kung ang ginagawa mo at kung paano ka kumikilos ay hindi ayon sa Aking mga salita, hahatulan ka. Hindi uubra ang panggagaya, pagiging tila tama ngunit mali, at bahagyang pagkaunawa; sa Aking harapan, dapat kang madalas na makipagbahaginan sa Akin.
Anuman ang kunin mo mula sa loob Ko ay magbibigay sa iyo ng landas para magsagawa. Sasamahan ka rin ng Aking kapangyarihan, magkakaroon ka ng Aking presensya, at magiging aktibo ang Aking mga salita sa iyong pagsasagawa sa bawat sandali; lalampasan mo ang lahat ng makamundong bagay at magtataglay ka ng dakilang kapangyarihan ng muling pagkabuhay. Kung wala sa iyong mga salita, pag-uugali, at mga kilos ang Aking mga salita at ang Aking presensya, at malayo ka sa Akin, ganap na namumuhay sa loob ng iyong sarili, sa loob ng mga kuru-kuro ng isip, at sa loob ng mga doktrina at regulasyon, nagpapatunay ito na itinuon mo ang iyong isip sa kasalanan. Patuloy ka lang na kumakapit sa dati mong sarili, hindi hinahayaang masaktan ang sarili kahit kaunti, o masugatan ang kaluluwa. Ang mga taong gumagawa nito ay napakahina ng kakayahan at napakakakatwa, at hindi nila nakikita ang biyaya ng Diyos o nakikilala ang Kanyang mga pagpapala. Kung patuloy kang iiwas nang husto, kailan mo Ako mahahayaang gumawa sa loob mo? Pagkatapos Kong magsalita, nakinig ka nga ngunit wala kang natandaan, at nagiging napakahina mo kapag natutukoy talaga ang mga problema mo. Anong uri ba ng tayog iyan? Kailan kita magagawang ganap kung lagi kang kailangang amuin? Kung natatakot kang mabunggo at magalusan, dapat kang magmadaling ibigay ang babalang ito: “Hindi ko hahayaang pungusan ako ng sinuman; kaya kong iwaksi ang likas at dati kong disposisyon nang ako lang.” Sa gayon, walang sinumang pupuna sa iyo o kakanti sa iyo, at magiging malaya kang manampalataya sa anumang paraang nais mo nang walang sinumang nakikialam sa iyo. Kung gayon, kaya mo bang sundan ang Aking mga yapak? Sinasabi mong natitiyak mo na Ako ang iyong Diyos at iyong Panginoon, pero hungkag na mga salita ang mga iyon. Kung talagang wala kang alinlangan, hindi magiging problema ang mga bagay na ito, at maniniwala ka na ang pagmamahal at mga pagpapala ng Diyos ang sumapit sa iyo. Kapag nagsasalita Ako, ito ay sa Aking mga anak, at dapat ialay ang mga pasasalamat at papuri.