Buksan ninyo ang inyong mga mata at tumingin kayo—makikita ninyo ang Aking dakilang kapangyarihan kahit saan! Makakamit ninyo ang katiyakan tungkol sa Akin kahit saan. Ipinoproklama ng kosmos at ng kalangitan ang Aking dakilang kapangyarihan. Ang pag-init ng panahon, pagbabago ng klima, mga abnormalidad ng tao, kawalan ng kaayusan ng mga dinamika ng lipunan, at panlilinlang sa loob ng puso ng mga tao ay tutupad lahat sa mga salitang Aking sinabi. Pumuputi ang araw at pumupula ang buwan; wala sa balanse ang lahat ng ito. Talaga bang hindi pa rin ninyo nakikita ang mga bagay na ito?

Ang dakilang kapangyarihan ng Diyos ay nabubunyag dito. Walang duda, Siya ang nag-iisang tunay na Diyos—ang Makapangyarihan sa lahat—na maraming taon nang hinahangad ng mga tao! Sino ang nakakapagsalita at pagkatapos ay nangyayari ang mga bagay-bagay? Tanging ang ating Makapangyarihang Diyos. Sa sandaling magsalita Siya, nagkakatotoo ang mga bagay-bagay. Paanong hindi masasabi ng isang tao na Siya ang tunay na Diyos?

Alam na alam Ko na kayong lahat ay handang makipagtulungan sa Akin, at naniniwala Ako na ang mga kapatid na Aking pinili, at Aking minamahal, ay mayroon lahat ng ganitong uri ng determinasyon—iyon nga lang, hindi kayo makapasok o makabahagi sa praktikal na pagsasanay. Hindi ninyo magawang maging mahinahon at kalmado kapag nahaharap sa paglitaw ng mga realidad, at palagi ninyong binabalewala ang mga layunin ng Diyos, inuuna ninyo ang sarili ninyong mga personal na interes, at kumikilos muna kayo sa sarili ninyong pagkukusa. Hayaan ninyong sabihin Ko sa inyo, hinding-hindi ninyo matutugunan ang Aking mga layunin sa pagkilos ninyo nang ganito! Aking mga Anak! Ibigay mo lang sa Akin ang iyong puso nang buong-buo. Kailangang malinaw ito sa iyo! Ayaw Kong lumapit ka sa Akin para maglingkod gamit ang iyong pera, mga pag-aari, sigasig, panlilinlang, o mga pagkalkula. Kapag may mga nangyayari, manahimik ka, maging dalisay ang puso mo, maghintay ka, at maghanap ka, at tiyak na bibigyan kita ng sagot. Huwag kang magduda! Bakit hindi ka kailanman naniniwala na totoo ang Aking mga salita? Bakit hindi mo magawang maniwala sa Aking mga salita? Masyado kang matigas ang ulo, at kahit sa ganitong panahon ay ganito ka pa rin; masyado kang hangal, at sadyang hindi mo ito nauunawaan kahit kaunti! Ilan sa mga pangunahing katotohanan ang natatandaan ninyo? Naranasan ba talaga ninyo ang mga ito? Sa tuwing may mga nangyayari, nalilito kayo at kumikilos nang walang pakundangan at padalos-dalos! Ang pangunahing bagay ngayon ay ang pumasok kayo sa espiritu at higit pang makipagbahaginan sa Akin, tulad lang ng patuloy ninyong pag-iisip tungkol sa isang partikular na problema sa inyong mga isipan—nauunawaan ba ninyo? Ito ang susi! Ang hindi pagsasagawa kaagad ay talagang isang problema. Magmadali—huwag nang mag-antala! Ang mga taong nakakarinig sa Aking mga salita at hindi nag-aantala, kundi isinasagawa ang mga ito kaagad ay tiyak na labis na pagpapalain! Tiyak na pagkakalooban Ko kayo nang doble! Huwag kayong mag-alala! Gawin ninyo ang sinasabi Ko, nang walang kahit isang segundong pag-aantala! Ang inyong mga kuru-kuro ng tao ay madalas na ganito—nag-aatubili kayo, palaging ipinagpapaliban hanggang bukas kung ano ang dapat gawin ngayon. Tamad kayo at labis na walang kakayahan. Imposible na itong ilarawan! Hindi Ako nagmamalabis—isa itong katunayan. Kung hindi mo ito pinaniniwalaan, maingat mong suriin ang iyong sarili, ikumpara mo ito sa sarili mong kondisyon, at matutuklasan mo na totoo nga ito!