Hindi sa mabuti o dalisay ang iyong pananalig, kundi kagila-gilalas ang Aking gawain! Ang lahat ay dahil sa Aking habag! Hindi ka dapat magkaroon ng munti mang tiwaling disposisyon ng pagkamakasarili o pagmamataas, kung hindi ay hindi Ako gagawa sa iyo. Kailangan mong maunawaan nang malinaw na hindi ang mga tao ang nagsasanhi na bumagsak ang isang tao o na tumayo nang matatag ang tao—Ako iyon. Ngayon, kung hindi mo nauunawaan nang malinaw ang puntong ito, tiyak na mabibigo kang makapasok sa kaharian! Kailangan mong maunawaan nang malinaw na ang ginagawa ngayon ay ang kamangha-manghang gawain ng Diyos; hindi ito ang kilos ng isang tao. Ano ba ang halaga ng mga kilos ng mga tao? Sila ay makasarili, mapagmataas, at palalo, o kaya ay ginagambala nila ang pamamahala ng Diyos at sinisira ang Kanyang mga plano. O, ang mga tiwali! Kailangan mong umasa sa Akin ngayon; kung hindi, sasabihin Ko sa iyo ngayon na wala kang anumang makakamit kailanman! Ang lahat ay mauuwi sa wala at ang iyong mga ginagawa ay mawawalan ng halaga!

Huwag kang magbagal o mag-alinlangan; ngayon, isasakatuparan ang Aking kamangha-manghang gawain sa bawat isa sa mga umiibig sa Akin. Ang mga hindi nagpapakumbaba, talagang hindi Ko ginagamit; sa ngayon, Akin lamang ginagamit ang mga lubusang nagpakumbaba. Ako ay magiging lubusang bukas lamang sa mga umiibig sa Akin nang may tunay na puso, na minamaliit ng iba, at na kayang buksan nang lubusan ang kanilang mga sarili sa Akin. Hahayaan kitang makita nang malinaw ang Aking mga layunin, at sa lahat ng sandali ay nasa Aking harapan ka na tumatanggap ng Aking mga pagpapala. Hinding-hindi Ko tatratuhin nang hindi patas ang mga gumugugol ng kanilang sarili para sa Akin ngayon, nag-aalay ng kanilang mga sarili para sa Akin ngayon, at bumabalikat ng mga pasanin para sa Akin ngayon—sa ganito nahahayag ang Aking pagiging matuwid. Huwag kayong magreklamo tungkol sa Akin; ang Aking biyaya ay sapat para sa inyo. Mainam na lumapit ka na lang at kunin ito nang matikman mo ang walang-kapantay na katamisan. Hindi lamang ito lilikha ng pag-ibig para sa Akin sa loob mo, kundi palalalimin pa nito ang pag-ibig mong iyon.

Ang Aking gawain ay isinasakatuparan nang paisa-isang hakbang, at hinding-hindi ito walang ingat o magulo. Upang masundan Ako, kailangan din ninyong gawin nang ganito ang mga bagay-bagay. Tingnan ninyo ang Aking asal at matuto mula sa Aking halimbawa; sa ganitong paraan, ang mga nakakasabay sa Aking mga yapak ay madadala sa katuparan ng kaharian. Humiyaw kayo sa saya nang may iisang tinig! Aking mga anak! Ang gawain ng Diyos ay isasakatuparan sa inyo, itong grupo ng mga tao. Hindi ba ninyo nararamdaman na pinagpala kayo?

Ito ay tunay ngang mahirap arukin! Dinala Ko kayo rito ngayon at binigyang-daan kayong makita ang Aking kamangha-manghang gawain!