Ang Aking gawain ay nagpatuloy na hanggang sa kasalukuyang yugto, at lahat ng ito ay sumunod sa matalinong pagsasaayos ng Aking kamay, at lahat ng ito ay naging malaking tagumpay Ko. Sino sa sangkatauhan ang makagagawa ng ganoong bagay? Hindi ba’t sa halip ay ginagambala ng mga tao ang Aking pamamahala? Gayunpaman, dapat mong malaman na walang sinumang makagagawa ng Aking gawain kapalit Ko, lalo na ang hadlangan ito, sapagkat wala ni isang tao na makapagsasabi o makagagawa ng mga bagay na Aking ginagawa at sinasabi. Bagamat ganito, ang mga tao ay hindi pa rin Ako nakikilala, Ako na ang marunong na Makapangyarihang Diyos! Hindi kayo maglalakas-loob na lantarang labanan Ako sa labas, datapwat nilalabanan ninyo Ako sa inyong mga kaisipan at ideya. Mga hangal! Hindi ba ninyo alam na Ako ang Diyos na nagmamasid sa kaibuturan ng puso ng tao? Hindi mo ba alam na inoobserbahan Ko ang bawat salita at gawa mo? Sinasabi Ko ito sa iyo: Hindi na kailanman muling bibigkas ang Aking mga labi ng banayad na mga salita. Sa halip, ang Aking mga salita ay lahat magiging mga salita ng mabagsik na paghatol, at Aking titingnan kung kaya mong tiisin ang mga iyon o hindi. Mula ngayon, ang mga hindi lumalapit sa Akin sa kanilang puso—ibig sabihin, iyong mga walang taos na pagmamahal para sa Akin—ay ang mga lantarang lumalaban sa Akin.

Sa kasalukuyan, ang gawain ng Banal na Espiritu ay dumating na sa puntong ang dating pamamaraan ay hindi na gagamitin; sa halip, isang bagong pamamaraan ang ginagamit. Ang mga hindi nakikipagtulungan sa Akin nang positibo at masigasig ay babagsak sa Hades, na isang bangin ng kamatayan (at ang mga taong ito ay mapapahamak magpakailanman). Ang bagong pamamaraan ay ang sumusunod: Kung ang iyong mga kaisipan at ideya ay hindi tama, sasapit sa iyo agad-agad ang Aking paghatol. Kasama rito ang pagkapit sa sanlibutan, kayamanan, pamilya, asawang lalaki, asawang babae, mga anak, mga magulang, pagkain at pag-inom, mga kasuotan, at lahat ng gayong bagay na hindi kabilang sa espirituwal na dako. Ang kaliwanagan ng mga banal ay magiging lalo’t lalong halata; ibig sabihin, ang mga damdamin ng buhay ay magiging lalo’t lalong halata at magiging patuloy sa pagkilos. Ang sinumang nagsasanhi ng kahit kaunting pagkagambala ay magdurusa ng matinding kakapusan, at maiiwanan nang napakalayo sa daang-takbuhan ng buhay. Ang mga walang pakialam, na hindi naghahangad nang may katapatan, ay lubusan Kong susukuan, at babalewalain Ko silang lahat nang walang eksepsiyon. Sila ay gagawing manlupaypay sa mga sakuna sa loob ng isanlibong taon. Para sa naman sa mga marubdob na naghahangad—ibig sabihin, iyong mga laging nagdudulot ng mga pagkagambala—Aking iwawaksi ang kanilang kamangmangan, gagawin Ko silang tapat sa Akin, at magkakaroon sila ng karunungan at katalinuhan. Sa gayon ay maghahangad sila nang may higit pang pananalig. Aking dinodoble ang Aking mga pagpapala sa lahat ng Aking panganay na mga anak at ang Aking pagmamahal ay dumarating sa inyo sa lahat ng sandali. Binabantayan Ko kayo at pinangangalagaan kayo sa lahat ng sandali at hindi Ko kayo pababayaang mahulog sa bitag ni Satanas. Sinimulan Ko nang ilunsad ang Aking gawain sa gitna ng di-mabilang na Aking hinirang na mga tao; ibig sabihin, nagdagdag na Ako ng isa pang proyektong gawain. Ang mga ito ang maglilingkod kay Cristo sa loob ng isanlibong taon, at napakalaking bilang ng mga tao ang dadagsa sa Aking kaharian.

Aking mga anak, dapat ninyong patindihin ang inyong pagsasanay. Maraming gawain ang naghihintay sa inyo, gawaing dapat ninyong gawin at tapusin. Hinihiling Ko lamang na magmadali na kayong gumulang, upang matapos ninyo ang gawain na Aking ipinagkatiwala sa inyo. Ito ang inyong banal na pananagutan, at ito ang tungkulin na dapat gampanan ninyo na Aking mga panganay na anak. Pangangalagaan Ko kayo hanggang sa marating ninyo ang katapusan ng landas, at poprotektahan Ko kayo nang sa gayon ay makapagtamasa kayo ng magagandang pagpapala kasama Ko magpakailanman! Bawat isa sa inyo ay dapat mayroong kabatiran sa katunayan na nagsaayos Ako ng maraming pangsakripisyong sangla at maraming kapaligiran, lahat upang gawin kayong perpekto. Ang lahat ng ito ay Aking mga pagpapala, hindi ba ninyo alam? Kayong lahat ay Aking minamahal na mga anak. Hangga’t taos-puso ninyo Akong minamahal, hindi Ko aabandonahin ni isa man sa inyo—bagamat nakasalalay ito sa kung kaya ninyo o hindi na maayos na makipagtulungan sa Akin.