Kabanata 61
Kapag may pagkaunawa ka tungkol sa iyong sariling kalagayan, matutugunan mo ang Aking mga layunin. Sa katunayan, ang Aking mga layunin ay hindi mahirap maarok; hindi ka lamang kailanman naghanap noong nakaraan nang naaayon sa Aking mga pagnanais. Hindi Ko ninanais ang mga kuru-kuro o kaisipan ng mga tao, lalo na ang iyong pera o iyong mga ari-arian. Ang nais Ko ay ang iyong puso. Nauunawaan mo ba? Ito ang Aking mga layunin; at higit pa rito, ito ang nais Kong makamit. Palaging ginagamit ng mga tao ang mga sarili nilang isipan at kuru-kuro upang husgahan Ako at ginagamit ang kanilang pamantayan upang tayahin ang Aking tayog. Sa mga tao, ito ang pinakamahirap na bagay na pakitunguhan, at ito ang kinasusuklaman at kinamumuhian Ko nang higit sa lahat. Nakikita mo na ba? Ito ay dahil ito ang pinakakitang-kitang disposisyon ni Satanas. Bukod pa roon, ang inyong tayog ay napakaliit kaya malimit kayong mahulog sa mga tusong pakana ni Satanas. Sadyang hindi ninyo kayang makilala ang mga iyon! Maraming ulit Ko nang sinabi sa inyo na maging maingat sa lahat ng sandali at sa lahat ng aspeto, upang hindi kayo malinlang ni Satanas. Ngunit hindi kayo nakikinig at sa halip ay basta na lamang ipinagwawalang-bahala ang Aking sinasabi. Bilang bunga, nauuwi kayo na magdusa ng mga kawalan sa buhay, at pagkatapos ay masyado nang huli para magsisi. Hindi ba’t magiging napakagandang ideya na ituring ninyo itong isang aral para sa inyong paghahangad sa hinaharap? Sinasabi Ko sa iyo! Ang pagiging madaling maging negatibo ay magdudulot ng mga kawalan sa iyong buhay—at ang gayong mga kawalan ay magiging lubhang matindi. Ngayon, dapat magising ka na sa wakas, hindi ba?
Gusto ng mga tao ng agarang mga resulta, at nakikita lamang nila kung ano ang nasa harapan nila. Kapag sinabi Kong sinimulan Ko nang kumilos para parusahan ang mga nasa kapangyarihan, lalo kayong nababalisa, at inyong itinatanong, “Bakit nasa kapangyarihan pa rin ang mga taong iyon? Hindi ba ito nangangahulugang hungkag ang mga salita ng Diyos?” Masyado nang nakabaon ang mga kuru-kuro ng tao! Hindi ninyo nauunawaan ang kahulugan ng Aking sinasabi. Ang Aking pinarurusahan ay ang masasama, ang mga lumalaban sa Akin, at ang mga hindi nakakikilala sa Akin, at hindi Ko pinapansin ang mga naniniwala lamang sa Akin ngunit hindi hinahanap ang katotohanan. Talagang napakamangmang ninyo! Hindi ninyo naunawaan ni isang butil ng Aking sinabi! Gayunman, pinupuri pa rin ninyo ang inyong mga sarili, iniisip na lumago na kayo, na nauunawaan ninyo ang mga bagay-bagay, at na kaya ninyong maarok ang Aking ang mga layunin. Malimit Kong sinasabi na ang lahat ng bagay at pangyayari ay nagseserbisyo kay Cristo, ngunit tunay mo bang nauunawaan ang mga salitang ito? Tunay ba kayong may pagkakilala sa mga ito? Sinabi Ko na noon na hindi Ako nagpaparusa sa sinuman nang padalos-dalos. Para sa bawat isang tao sa buong sansinukob, mayroon Akong mga angkop na pagsasaayos. Kung sino-sino ang mga pakay ng Aking kaparusahan, kung sino-sino ang nagseserbisyo kay Cristo (mga hindi Ko ililigtas), kung sino-sino ang mga hinirang Ko, at kung sino-sino, pagkatapos Kong hirangin, ang ititiwalag kalaunan—ang lahat ng ito ay hawak sa Aking mga kamay, lalo na ikaw, na isa sa mga hinirang na mas nauunawaan Ko pa. Kung ano ang ginagawa Ko sa panahong ito at kung ano ang gagawin Ko sa susunod ay kapwa pinamamahalaan ng Aking matatalinong pagsasaayos. Hindi mo kailangang magsaayos ng anuman para sa Akin nang pauna; maghintay ka lamang at magtamasa! Ito ay isang bagay na karapat-dapat sa iyo. Aking pinangingibabawan ang pag-aari Ko at hindi Ko basta pinalalampas ang nangangahas na magreklamo o magkaroon ng iba pang palagay tungkol sa Akin. Madalas Akong magalit nitong mga araw, dahil ang programa ng mga atas administratibo na Aking isinaayos ay umusad na sa yugtong ito. Huwag mong ipagpalagay na hindi Ako maluwag. Dahil, gaya ng sinabi Ko na dati, walang bagay, tao, o pangyayari ang nangangahas na hadlangan ang Aking mga hakbang pasulong. Ginagawa Ko kung ano ang Aking sinasabi, at ganito kung ano Ako; at higit pa riyan, ito ang pinakakitang-kitang pagpapamalas ng Aking disposisyon. Pinakikitunguhan Ko ang lahat ng tao nang parehas, dahil kayong lahat ay Aking mga anak, at mahal Ko ang bawat isa sa inyo. Sinong ama ang hindi inaako ang pananagutan para sa buhay ng kanyang anak? Sinong ama ang hindi nagsisipag araw at gabi para sa kinabukasan ng kanyang anak? Sino sa inyo ang nakaaalam nito? Sinong makapagpapakita ng konsiderasyon sa Aking puso? Patuloy kayong gumagawa ng mga plano at mga pagsasaayos para sa sarili ninyong mga makalamang kasiyahan, at wala kayong anumang pagkaunawa sa Aking puso. Nadudurog ang Aking puso sa pag-aalala sa inyo, subalit palagi kayong nagpapasasa sa mga makalamang kasiyahan, kumakain at umiinom, natutulog, at nagbibihis. Wala ba kayo ni katiting na konsensya? Kung ganoon, mga halimaw lamang kayo na nakadamit-pantao. Ang sinasabi Ko ay hindi labis at dapat kaya ninyong tiisin ang mga salitang ito. Ito ang pinakamabuting paraan upang iligtas kayo, at, higit pa riyan, narito ang Aking karunungan: Paghataw sa nakapagpapabagsak na kahinaan ni Satanas, nilulupig ito nang lubusan, at iniiwan itong ganap na nawasak. Hangga’t nagsisisi ka at tinitiyak mong umaasa ka sa Akin upang alisin ang iyong lumang kalikasan at isabuhay ang larawan ng isang bagong tao, Ako ay lubusang masisiyahan, dahil sa paraang ito, isasabuhay mo ang isang normal na pagkatao, at patotohanan ang Aking pangalan. Wala nang ibang mas nagpapasaya sa Akin.
Dapat kang lumapit sa Akin sa lahat ng oras. Nakikita na ang Aking paglakad ay bumibilis bawat araw. Kung wala kang pagbabahagi na nasa espiritu nang kahit isang saglit lamang, agad na sasapit sa iyo ang Aking paghatol. Sa puntong ito ay nagtamo ka na ng malalim na pagkatanto. Kinakastigo kita hindi dahil sa hindi kita mahal; kundi, dinidisiplina kita dahil sa pagmamahal Ko sa iyo. Kung hindi ay hindi ka lalago at lagi ka na lamang magiging mapagpalayaw at hindi napipigilan ng Banal na Espiritu. Lalo nitong ipinakikita ang Aking karunungan.