Ibinunyag Ko ang lahat ng Aking sarili sa inyong lahat, ngunit bakit hindi ninyo magawang pagnilayan ang Aking mga salita nang inyong buong puso at isipan? Bakit itinuturing ninyong basura ang Aking mga salita? Mali ba ang Aking sinasabi? Tinamaan ba ng Aking mga salita ang inyong mga kahinaan? Patuloy kayong nagpapaliban at nag-aatubili. Bakit kayo kumikilos nang ganito? Hindi ba malinaw ang Aking pagkakasabi? Napakaraming beses Ko nang sinabi na dapat na pagnilayan nang mabuti ang Aking mga salita, at dapat na pagtuunan nang husto ang mga ito. Mayroon ba sa inyo na masunurin at nagpapasakop na mga anak? Nawalan ba ng saysay ang Aking mga salita? Wala ba ni anumang bisa ang mga ito? Gaano karami sa iyo ang naaayon sa Aking mga layunin? Kung ikaw ay hindi napagsasabihan, kahit isang sandali lamang, ikaw ay magiging mapagpalayaw at hindi napipigilan. Kung hindi Ko sasabihin nang malinaw kung paano kumilos at magsalita, maaari kayang sa kaibuturan mo ay wala kang magiging ideya? Hayaang sabihin Ko ito sa iyo! Siya na nagdurusa ng mga kawalan ay siya na masuwayin, hindi nagpapasakop, at nalilitong naniniwala! Ang mga tao na hindi pinagtutuunan ng pansin ang Aking sinasabi at hindi naiintindihan ang mga detalye ay hindi makaaarok sa Aking mga layunin, ni hindi nila Ako magagawang paglingkuran. Ang ganitong mga tao ay pupungusan Ko at makararanas ng Aking paghatol. Iyong mga hindi nakakaintindi sa mga detalye ay sukdulang mapangahas at sadyang mapusok; kung kaya kinamumuhian Ko ang ganitong mga tao, at hindi Ako magiging maluwag sa kanila. Hindi Ako magpapakita sa kanila ng awa; ang ipapakita Ko lamang sa kanila ay ang Aking pagiging maharlika at paghatol. Tingnan mo kung gayon kung maglalakas-loob ka pa ring linlangin Ako. Ako ang Diyos na sumisiyasat sa kaibuturan ng puso ng tao. Dapat maging malinaw sa lahat ang puntong ito; kung hindi, gagawin lamang nila ang kanilang gawain sa kaswal na paraan at pabasta-basta Akong haharapin. Ito ang dahilan kung bakit ang ilang tao ay hinahampas Ko nang hindi nila namamalayan. Sinabi Ko na hindi Ko pakikitunguhan ang sinuman nang hindi makatarungan, na hindi Ako gumagawa ng mali, at na lahat ng Aking ginagawa ay ayon sa matalinong pagsasaayos ng Aking kamay.

Ang Aking paghatol ay sumapit sa lahat ng tao na hindi tunay na nagmamahal sa Akin. Sa panahong ito mismo mahahayag iyong mga paunang itinadhana at pinili Ko, gayundin iyong mga ititiwalag Ko. Ang lahat ng ito ay isa-isang ihahayag, at walang mananatiling nakatago. Lahat ng tao, pangyayari, at bagay ay itinatatag at umiiral upang isakatuparan ang Aking mga salita, at lahat ay abala na gawing totoo ang mga salita na binibigkas ng Aking bibig. Ako lamang ang namamahala sa sansinukob at sa mga pinakadulo ng mundo. Hahampasin Ko ang sinumang mangangahas na suwayin ang Aking mga salita o tumangging isagawa ang Aking mga gawa, na nagiging sanhi para masadlak sa Hades ang taong iyon at hindi na mabuhay pa. Lahat ng Aking salita ay naaangkop at wasto, at lubos na walang bahid ng karumihan. Ang inyo bang pananalita ay maaaring maging katulad ng sa Akin? Kayo ay maligoy; wala kayong katuturan at hindi ipinapaliwanag nang malinaw ang inyong sarili—gayunman, iniisip pa rin ninyo na nagkamit kayo ng ilang bagay, at na halos sapat kayo. Hayaan mong sabihin Ko ito sa iyo! Kapag mas nasisiyahan sa sarili ang mga tao, mas malayo sila sa Aking mga pamantayan. Hindi sila nagpapakita ng pagsasaalang-alang sa Aking mga layunin at sukdulan nila Akong dinadaya at sinisira ang Aking pangalan! Napakawalang kahihiyan! Hindi mo tinitingnan kung anong uri ng tayog ang mayroon ka. Napakahangal at mangmang mo!

Ang Aking mga salita ay patuloy na, at sa lahat ng aspekto ay, naglilinaw ng mga bagay-bagay. Maaari kayang hindi mo pa rin ito nauunawaan? Hindi mo pa rin ba naiintindihan? Intensiyon mo bang biguin Ako? Maging masigla ka, at hugutin ang iyong katapangan. Hindi Ko tinatrato nang hindi makatarungan ang sinumang nagmamahal sa Akin. Sinisiyasat Ko ang kaibuturan ng puso ng tao, at alam Ko ang lahat ng nasa loob ng puso ng lahat ng tao. Ang lahat ng bagay na ito ay isa-isang ibubunyag, at ang lahat ay Aking sisiyasatin. Hindi Ko kailanman kakaligtaan ang sinumang tunay na nagmamahal sa Akin; silang lahat ay tatanggap ng mga pagpapala, at sila ang grupo ng mga panganay na anak na Aking paunang itinadhana na maging mga hari. Para naman sa mga hindi tunay na nagmamahal sa Akin, sila ang mga puntirya ng kanilang sariling mga panlalansi, at mapapahamak; ito rin ay Aking paunang inorden. Huwag mabalisa; isa-isa Ko silang ibubunyag. Inihanda Ko nang mabuti ang gawaing ito nang maaga, at sinimulan Ko nang gawin ito. Ito ay ginagawang lahat sa maayos na paraan; hindi talaga ito magulo. Napagpasyahan Ko na kung sino ang pipiliin at kung sino ang ititiwalag. Isa-isa silang ibubunyag upang inyong makita. Sa mga panahong ito ay makikita ninyo kung ano ang ginagawa ng Aking kamay. Makikita ng lahat ng tao na ang Aking pagiging matuwid at maharlika ay hindi nagpapahintulot ng pagkakasala o paglaban mula sa sinuman, at ang sinumang lumalapastangan ay parurusahan nang matindi.

Ako ang Siyang patuloy na nagmamasid sa kaibuturan ng puso ng lahat. Huwag lamang Akong tingnan mula sa panlabas. Mga taong bulag! Hindi kayo nakikinig sa mga salita na sinabi Ko nang napakalinaw, at sadyang hindi ninyo Ako pinaniniwalaan—ang ganap na Diyos Mismo. Tiyak na hindi Ko hahayaan ang sinumang mangahas na manlinlang o magtago ng anumang bagay sa Akin.

Naaalala mo ba ang bawat isa sa Aking mga pagbigkas? “Ang makita Ako ay katulad ng pagkakita sa bawat nakatagong misteryo mula sa walang-katapusan hanggang sa walang-katapusan.” Napagnilayan mo na ba nang mabuti ang pahayag na ito? Ako ang Diyos, at ang Aking mga misteryo ay ipinakita upang makita ninyo. Hindi ba ninyo nakita ang mga ito? Bakit hindi ninyo Ako binibigyang-pansin? At bakit mo labis na sinasamba ang malabong diyos na nasa iyong isipan? Paanong Ako—ang nag-iisang tunay na Diyos—ay makagagawa ng anumang mali? Pakaintindihin ito! Maging sigurado dito! Ang Aking bawat salita at kilos, ang bawat gawa at bawat galaw Ko, ang Aking pagngiti, ang Aking pagkain, ang Aking pananamit, ang lahat ng sa Akin ay ginawa ng Diyos Mismo. Tinimbang ninyo Ako: maaari kayang nakita na ninyo ang Diyos bago pa man Ako dumating? Kung hindi, bakit lagi mo Akong inihahambing sa iyong diyos sa iyong isipan? Ang mga iyon ay pawang mga kuru-kuro ng tao! Ang Aking mga kilos at pag-uugali ay hindi tumutugma sa iyong mga imahinasyon, hindi ba? Hindi Ko tinutulutan ang sinumang tao na magpahayag ng opinyon kung ang Aking mga kilos at pag-uugali ay tama o mali. Ako ang nag-iisang tunay na Diyos, at ito ang hindi mababago at hindi mapag-aalinlanganang katotohanan! Huwag maging biktima ng iyong sariling mga panlalansi. Tinukoy ito ng Aking mga salita nang may ganap na kalinawan. Wala ni katiting man lang na katangian ng tao sa Akin; ang lahat sa Akin ay ang Diyos Mismo, na lubos na ibinunyag sa inyo, nang wala ni isang bagay na nakatago!