Ang iglesia ay itinatayo, at ginagawa ni Satanas ang buong makakaya nito upang gibain ito. Nais nitong gibain ang Aking pagtatayo sa anumang posibleng paraan; dahil dito, dapat na dalisayin kaagad ang iglesia. Wala ni katiting na mga latak ng kasamaan ang dapat matira; dapat dalisayin ang iglesia upang wala itong maging kapintasan at magpatuloy itong maging kasingdalisay ng dati. Dapat maging mapagbantay kayo at maghintay sa lahat ng oras, at dapat kayong mas manalangin sa harapan Ko. Dapat ninyong matalos ang iba’t ibang balak at mga pakana ni Satanas, makilala ang mga espiritu, makilala ang mga tao, at makayang makilatis ang lahat ng uri ng tao, pangyayari, at bagay. Dapat ding kumain at uminom kayo ng marami pang mga salita Ko at, lalong mahalaga, dapat ninyong magawang kainin at inumin ang mga ito nang kayo lamang. Sangkapan ninyo ang inyong mga sarili ng lahat ng katotohanan, at lumapit sa Akin upang mabuksan Ko ang inyong espirituwal na mga mata at mapahintulutan kayong makita ang lahat ng hiwaga na nasa loob ng espiritu…. Sa sandaling magsimula ang pagtatayo ng iglesia, nagdudulot ito ng labanan ng mga banal, at ang iba’t ibang nakapangingilabot na katangian ni Satanas ay pawang inilalatag sa harap ninyo. Titigil ba kayo at uurong, o tatayo ba kayo at patuloy na lalakad pasulong nang umaasa sa Akin? Lubusan ninyong ilantad ang tiwali at pangit na mga katangian ni Satanas, huwag magsaalang-alang ng mga damdamin kahit kaunti, at huwag kayong magpakita ng awa! Labanan ninyo si Satanas hanggang kamatayan! Ako ang iyong suporta, at dapat kang magkaroon ng espiritu ng batang lalaki! Nagwawala si Satanas sa kahuli-hulihang paghihingalo nito, pero hindi pa rin nito matatakasan ang Aking paghatol. Nasa ilalim ng Aking mga paa si Satanas at tinatapakan din ito ng inyong sariling mga paa.Ito ay tiyak na totoo!

Lahat ng relihiyosong nanggagambala, at ang mga gumigiba sa pagtatayo ng iglesia, ay hindi mapakikitaan ng kahit katiting na pagpaparaya at sa halip ay kaagad silang hahatulan; si Satanas ay malalantad, yuyurakan, lubusang wawasakin, at maiiwan na walang matataguan. Tiyak na ibubunyag ng lahat ng uri ng mga diyablo at demonyo ang kanilang tunay na mga anyo sa harapan Ko, at itatapon Ko silang lahat sa walang hanggang hukay kung saan hindi sila makalalaya kailanman; lahat sila ay magiging nasa ilalim ng ating mga paa. Kung gusto ninyong ipaglaban ang mabuting laban para sa katotohanan, una sa lahat, hindi ninyo dapat bigyan si Satanas ng anumang pagkakataon na gumawa—sa layuning ito, kailangan ninyong maging isa sa isipan at magawang makipagtulungan sa paglilingkod, bitiwan ang lahat ng sarili ninyong kuru-kuro, opinyon, pananaw at paraan ng paggawa ng mga bagay-bagay, patahimikin ang puso ninyo sa loob Ko, magtuon sa tinig ng Banal na Espiritu, pagtuunan ng pansin ang gawain ng Banal na Espiritu, at danasin ang mga salita ng Diyos nang detalyado. Dapat kayong magkaroon ng isang intensiyon lamang, ang sumunod sa kalooban Ko. Wala kayo dapat na iba pang intensiyon bukod dito. Dapat kayong lahat na bumaling sa Akin nang buong puso, masdang mabuti ang Aking mga pagkilos at ang paraan ng paggawa Ko ng mga bagay-bagay, at hindi maging pabaya sa anumang paraan! Dapat na matalas ang inyong espiritu, bukas ang inyong mga mata. Pagdating sa mga karaniwang may hindi wastong mga intensiyon at layon, na gustong nakikita ng iba, at sabik gumawa ng mga bagay-bagay, na may tendensiyang magdulot ng mga pagkagambala, na nakababad sa mga doktrinang panrelihiyon, na mga alipin ni Satanas, at iba pa—kapag tumatayo ang mga taong ito, nagiging suliranin sila para sa iglesia, at napupunta sa wala ang pagkain at pag-inom ng mga kapatid sa mga salita ng Diyos. Kapag nakatuklas kayo ng ganitong mga tao na nagpapasikat, agad na pagbawalan sila. Kung, sa kabila ng paulit-ulit na mga pagpapaalaala, hindi sila nagbabago, daranas sila ng kawalan. Kung ang mga nagmamatigas na ipilit ang kanilang paraan ay magtatangkang ipagtanggol ang kanilang sarili at susubukang pagtakpan ang kanilang mga kasalanan, dapat silang agad na putulin ng iglesia at huwag bigyan ng pagkakataon para magmaniobra. Huwag mawalan ng marami sa pagsisikap na magligtas ng kaunti; ituon ang pansin sa kabuuan.

Ang inyong espirituwal na mga mata ay dapat na ngayong mabuksan, at makakilala ng ilang uri ng mga tao sa iglesia:

Anong uri ng mga tao ang may espirituwal na pang-unawa at nakakikilala sa mga espiritu?

Anong uri ng mga tao ang walang espirituwal na pang-unawa?

Anong uri ng mga tao ang may masamang espiritu?

Anong uri ng mga tao ang may gawain ni Satanas sa kanila?

Anong uri ng mga tao ang may tendensiyang magdulot ng mga pagkagambala?

Anong uri ng mga tao ang may gawain ng Banal na Espiritu sa kanila?

Anong uri ng mga tao ang nagpapakita ng pagsasaalang-alang sa pasanin ng Diyos?

Anong uri ng mga tao ang makasusunod sa kalooban Ko?

Sino ang Aking tapat na mga tagapagpatotoo?

Alamin na ang kaliwanagang idinudulot ng Banal na Espiritu sa mga iglesia ang pinakamataas na pangitain ngayon. Huwag kayong maguluhan tungkol sa mga bagay na ito; sa halip, maingat ninyong pagnilayan ang mga ito hanggang sa lubusan ninyong maunawaan ang mga ito—lubhang napakahalaga nito para sa inyong pag-usad sa buhay! Kung hindi ninyo nauunawaan ang mga bagay na ito na nasa harap mismo ng inyong mga mata, hindi ninyo makakayang tahakin ang landas pasulong; manganganib kayong mahulog sa tukso at mabihag anumang oras, at maaari kayong lamunin. Ang pangunahing mga bagay na dapat ninyong gawin ngayon ay tumuon sa paglapit sa Akin sa puso ninyo at higit pang makipagbahaginan sa Akin. Anumang kulang sa iyo o hinahanap mo ay magiging buo sa iyo sa pamamagitan ng gayong pagiging malapit at pakikipagbahaginan. Tiyak na tutustusan ang buhay mo, at magkakaroon ka ng bagong kaliwanagan. Hindi Ko kailanman tinitingnan kung gaano ka kahangal sa nakaraan, ni tinatandaan ang inyong mga pagsalangsang. Tinitingnan Ko kung paano mo Ako minamahal: Kaya mo ba Akong mahalin nang higit sa anupaman? Tinitingnan Ko kung kaya mo o hindi na bumalik at umasa sa Akin para iwaksi ang iyong kahangalan. Ang ilang tao ay sumasalungat sa Akin, hayagang lumalaban sa Akin, at hinuhusgahan ang iba; hindi nila nakikilala ang Aking mga salita, at lalong malamang na hindi rin nila matagpuan ang Aking mukha. Lahat ng nasa harapan Ko na taos-pusong naghahanap sa Akin, na may mga pusong nagugutom at nauuhaw sa katuwiran—pagkakalooban kita ng kaliwanagan at ipapamalas sa iyo ang mga bagay-bagay, tinutulutan kang makita Ako ng iyong sariling mga mata at maarok ang Aking mga layunin nang personal; tiyak na maipapamalas sa iyo ang Aking puso, upang makaunawa ka. Ang kaliwanagang ibinibigay Ko sa iyo, dapat mong isagawa ayon sa Aking mga salita; kung hindi, ikaw ay hahatulan. Sumunod ka sa mga layunin Ko—saka ka lamang hindi maliligaw.

Para sa lahat ng naghahangad na makapasok sa Aking mga salita, dobleng biyaya at mga pagpapala ang mapapasakanila, magkakamit sila ng bagong kaliwanagan at mga kabatiran sa bawat araw, at mararamdaman nilang mas sariwa ang Aking mga salita sa pamamagitan ng pagkain at pag-inom ng mga ito sa araw-araw. Matitikman nila ang mga ito sa kanilang sariling bibig: Napakatamis nito! … Dapat kang maging maingat, at huwag makuntento kapag nagkamit ka na ng kaunting kaunawaan at nakatikim ng katamisan; ang susi ay ang magpatuloy sa paghahanap pasulong! Iniisip ng ilang tao na ang gawain ng Banal na Espiritu ay totoong kamangha-mangha at tunay—ito nga talaga ang persona ng Makapangyarihang Diyos na hayagang nagpapakita, at mas malalaki pang mga tanda at kababalaghan ang nasa hinaharap. Maging mapagmasid ka at mapagbantay sa lahat ng oras, panatilihin mong nakatuon ang iyong paningin sa pinagmulan, manahimik ka sa Aking harapan, maging mapagmasid at makinig nang mabuti, at maging tiyak tungkol sa Aking mga salita. Hindi maaaring may kalabuan; kung may anumang pag-aalinlangan, nangangamba Ako na ipatatapon ka sa labas ng pintuan. Magkaroon ka ng malilinaw na pangitain, maging praktikal at matatag, sundan itong daloy ng buhay, at sundang mabuti saanman ito dumaloy; talagang hindi ka dapat magtaglay ng anumang pag-aatubili ng tao. Kumain, uminom at magbigay-papuri ka lamang; maghanap nang may dalisay na puso, at huwag sumuko kailanman. Dalhin mo ang anumang hindi mo maunawaan sa harapan Ko nang madalas, at tiyakin mong huwag magkimkim ng anumang mga pagdududa, upang hindi ka magdusa ng malalaking kawalan. Sumabay ka! Sumabay ka! Huwag kang lalayo! Itapon mo ang mga humahadlang sa iyo, at huwag kang maging mapagpalayaw. Maghabol nang buong-puso, at huwag umurong. Dapat mong ihandog ang iyong puso sa lahat ng oras at huwag kailanman palampasin ang kahit isang sandali. Ang Banal na Espiritu ay patuloy na gumagawa ng bagong gawain, gumagawa ng mga bagong bagay sa bawat araw, at may mga bagong kaliwanagan sa bawat araw; ang pagbabagong-anyo sa bundok, ang banal na espirituwal na katawan ng Diyos ay nagpakita na! Ang Araw ng katuwiran ay nagbibigay ng liwanag at nagniningning; nakita na ng di-mabilang na mga bayan at tao ang Iyong maluwalhating mukha. Magniningning ang Aking liwanag sa lahat ng lumalapit sa harapan Ko. Ang Aking mga salita ay liwanag, na umaakay sa iyo pasulong. Hindi kayo babaling sa kaliwa o sa kanan habang kayo ay naglalakad, kundi lalakad sa loob ng Aking liwanag, at saka lamang hindi magiging walang-saysay ang inyong pagtakbo. Dapat ninyong malinaw na makita ang gawain ng Banal na Espiritu; ang Aking mga layunin ay naroon sa loob nito. Nakakubli ang lahat ng hiwaga, ngunit unti-unting magiging malinaw sa iyo ang mga ito. Isaisip mo ang Aking mga salita sa lahat ng oras, at lumapit ka sa harapan Ko upang higit na makipagbahaginan sa Akin. Sumusulong ang gawain ng Banal na Espiritu. Sumunod ka sa Aking mga yapak; naghihintay ang malalaking kababalaghan, at magpapakita ang mga ito sa iyo nang isa-isa. Ang mga mapagmasid, mga naghihintay, at mga mapagbantay ang makakakita sa mga ito. Tiyaking huwag magpabaya. Malapit nang matapos ang plano ng pamamahala ng Diyos; magtatagumpay ang pagtatayo ng iglesia, ang bilang ng mga matagumpay ay itinakda na, ang matatagumpay na batang lalaki ay magagawang ganap, at papasok sila sa kaharian kasama Ko, maghahari kasama Ko, pamumunuan ang di-mabilang na mga bansa gamit ang tungkod na bakal, at magsasama-sama sa kaluwalhatian!