Nakapagsimula na Akong kumilos para parusahan yaong mga gumagawa ng masama, at yaong mga gumagamit ng kapangyarihan at umuusig sa mga anak ng Diyos. Mula ngayon, ang kamay ng Aking mga atas administratibo ay laging mananatili sa mga kumokontra sa Akin sa kanilang puso. Alamin ito! Ito ang simula ng Aking paghatol, at walang awang ipapakita kaninuman, ni walang sinumang paliligtasin, sapagkat Ako ang Diyos na walang mga damdamin ng laman at nagsasagawa ng katuwiran, at makakabuting tanggapin ninyong lahat ito.

Hindi sa nais Kong parusahan yaong mga gumagawa ng masama; sa halip, ito ay ganting hatid nila sa kanilang sarili dahil sa sarili nilang kasamaan. Hindi Ako mabilis magparusa kaninuman, ni hindi Ko tinatrato ang sinuman nang hindi makatarungan—nagsasagawa Ako ng katuwiran sa lahat. Aking mga anak, talagang mahal Ko, at yaong masasama na lumalaban sa Akin, talagang kinamumuhian Ko; ito ang prinsipyo sa likod ng Aking mga kilos. Bawat isa sa inyo ay dapat magkaroon ng kabatiran sa Aking mga atas administratibo; kung hindi, hindi kayo magkakaroon ng kahit katiting na pangamba, at kikilos kayo nang walang-ingat sa Aking harapan. Hindi rin ninyo malalaman kung ano ang nais Kong isakatuparan, kung ano ang nais Kong matamo, kung ano ang nais Kong makamit, o kung anong klaseng tao ang kailangan ng Aking kaharian.

Ang Aking mga atas administratibo ay:

1. Sino ka man, kung kinokontra mo Ako sa puso mo, hahatulan ka.

2. Didisiplinahin kaagad yaong mga taong Aking nahirang sa anumang maling naisip nila.

3. Ilalagay Ko sa isang tabi yaong mga hindi nananampalataya sa Akin at tutulutan Ko silang magsalita at kumilos nang walang-ingat; sa huli, lubusan Ko silang parurusahan at pakikitunguhan.

4. Pangangalagaan at poprotektahan Ko yaong mga nananampalataya sa Akin sa lahat ng oras. Sa lahat ng oras ay pagkakalooban Ko sila ng buhay sa pamamagitan ng pagliligtas. Mamahalin Ko ang mga taong ito at siguradong hindi sila mahuhulog o maliligaw ng landas. Anumang kahinaan nila ay magiging pansamantala, at tiyak na hindi Ko tatandaan ang kanilang mga kahinaan.

5. Yaong mga tila naniniwala, ngunit hindi naman talaga—na naniniwala na mayroong isang Diyos ngunit hindi naghahangad kay Cristo, subalit hindi rin naman lumalaban—sila ang pinakakaawa-awang mga tao, at sa pamamagitan ng Aking mga gawa, hahayaan Kong makakita sila nang malinaw. Sa pamamagitan ng Aking mga kilos, ililigtas Ko ang gayong mga tao at ibabalik sila.

6. Ang mga panganay na anak, ang unang tumanggap sa Aking pangalan, ay pagpapalain! Tiyak na ipagkakaloob Ko ang pinakamagagandang pagpapala sa inyo, tutulutan kayong matamasa ang mga ito hangga’t gusto ninyo; walang sinumang mangangahas na hadlangan ito. Ang lahat ay inihanda nang buo para sa inyo, dahil ito ang Aking atas administratibo.

Dapat ninyong makita, sa lahat ng aspeto, ang lahat ng kilos ng Aking kamay at lahat ng ideya sa Aking puso. Hindi ba para sa inyo ang lahat? Sino sa inyo ang para sa Akin? Nasiyasat na ba ninyo ang mga ideya sa inyong puso o ang mga salitang sinasambit ninyo? Napag-isipan na ba ninyo nang husto ang mga bagay na ito? Hangal! Talipandas! Hindi mo tinatanggap ang mga pagpigil ng Banal na Espiritu! Paulit-ulit Ko nang ipinarating ang Aking tinig sa iyong kalooban, subalit wala ka man lang reaksyon. Huwag ka nang magpakabobo! Ang pag-arok sa Aking mga layunin ay tungkulin mo; bukod dito, ito ang landas na dapat mong tahakin. Ikaw ay tao na magulo ang isip, wala kang kabatiran, at hindi mo nakikita nang malinaw kung ano ang nais Kong matamo sa iyo o makamit mula sa iyo! Upang maarok ang Aking mga layunin, kailangan mong magsimula sa pamamagitan ng paglapit sa Akin at higit na pakikipagbahaginan sa Akin. Palagi mong sinasabi na hindi mo nauunawaan ang Aking mga layunin. Puno ka na ng sarili mong mga bagay, kaya, paano Ako makakagawa sa iyo? Hindi ka nagkukusang lumapit sa Aking harapan, kundi pasibo ka lang na naghihintay. Sinasabi Ko na para kang isang uod, subalit minamasama mo ito at ayaw mo itong tanggapin. Sa pagkakataong ito dapat kang bumangon at makipagtulungan sa Akin! Huwag maging pasibo! Makakapigil iyan sa buhay mo. Ang pagiging aktibo ay magdadala ng mga pakinabang sa iyo, hindi sa iba. Hindi mo pa rin ba nakikilala at nauunawaan ito nang lubusan? Palaging naipapamalas sa iyo ang Aking mga layunin. Hindi mo pa ba nahihiwatigan ang mga iyon? Bakit hindi mo nabigyang-pansin ang mga iyon kailanman? Bakit hindi mo nagawang unawain ang Aking mga layunin kailanman? Talaga bang walang ihahatid na pakinabang sa iyo ang pag-unawa sa Aking mga layunin?

Nais Kong magpakita ka ng pagsasaalang-alang sa Aking mga layunin sa lahat ng aspekto para sa pamamagitan mo, magkakaroon Ako ng isang daan pasulong at isang tahanang mapagpapahingahan. Huwag mo na Akong hadlangan—napakalupit niyan! Wala kang pagkaunawa sa Aking mga salita, at hindi ka tumutugon sa mga ito. Tingnan mo kung anong oras na ngayon; hindi na maaaring maghintay pa! Kung hindi mo susundang maigi ang Aking mga yapak, magiging huli na ang lahat, at lalong wala nang anumang paraan para matubos mo ito!