Nasuri mo na ba ang bawat isa sa iyong mga iniisip at ideya, at ang bawat kilos mo? May malinaw na ideya ka ba kung alin sa mga ito ang kaayon sa Aking mga layunin at kung alin ang hindi? Wala ka talagang kakayahang makilatis ang mga ito! Bakit hindi ka pa humaharap sa Akin? Dahil ba hindi Ko sasabihin sa iyo, o may iba pang dahilan? Dapat alam mo! Yaong mga pabaya ay lubos na hindi makakaarok sa Aking mga layunin o makakatanggap ng anumang dakilang pagtanglaw o paghahayag.

Natuklasan mo na ba ang mga dahilan kung bakit hindi makapagtamo ng panustos at walang tunay na pagbabahaginan ang iglesia? Alam mo ba kung ilang salik na humantong sa ganito ang may kinalaman sa iyo? Pinagbilinan kita na magtustos ng buhay at palabasin ang Aking tinig. Nagawa mo na ba ang mga bagay na ito? Mapapanagutan mo ba ang pagkaantala ng paglago sa buhay ng iyong mga kapatid? Kapag may nakakaharap kang mga isyu, sa halip na maging kalmado at mahinahon, nababagabag ka. Talagang wala kang kabatiran! Dapat ilabas ang Aking tinig sa mga banal. Huwag mong pigilan ang gawain ng Banal na Espiritu, at huwag mo Akong antalahin; hindi makikinabang ang sinuman sa anuman diyan. Nais Kong ialay mo nang lubusan ang iyong sarili sa Akin, sa katawan at isipan, ang bawat iniisip at ideya mo ay para sa Akin, nakikibahagi ka sa Aking mga iniisip at alalahanin, at ang lahat ng iyong ginagawa ay para sa kapakanan ng kaharian sa kasalukuyan at sa Aking pamamahala, at hindi para sa sarili mo. Iyan lamang ang makakalugod sa puso Ko.

Wala Akong anumang nagawa na walang patunay. Bakit hindi mo pa Ako natutularan? Bakit hindi ka pa naghahanap ng patunay sa iyong ginagawa? Ano pa ang nais mong sabihin Ko? Hinawakan kita sa kamay upang turuan ka, subalit hindi mo nagawang matuto. Napakatunggak mo! Nais mo bang magsimulang muli sa umpisa? Huwag kang masiraan ng loob. Kailangan mong minsan pang bumangon, at ilaan ang iyong sarili nang buo alang-alang sa mga inaasam at ninanais na pawang pinanghahawakan ng mga banal. Alalahanin ang mga salitang ito: “Kayong mga taos-pusong gumugugol ng inyong sarili para sa Akin, kayo ay tiyak na labis Kong pagpapalain.”

Anuman ang ginagawa mo ay kailangan mong gawin sa maayos na paraan, hindi padaskul-daskol. Talaga bang nangangahas kang sabihin na alam na alam mo ang kondisyon ng mga banal? Ipinapakita niyan na hindi ka nagtataglay ng karunungan, na hindi mo pa sineryoso man lamang ang bagay na ito, at na hindi ka pa nakagugol ng anumang panahon dito. Kung tunay mong magugugol ang iyong buong panahon dito, kung gayon, makikita mo kung ano ang magiging panloob mong kondisyon. Hindi ka naghahangad na gumawa ng mga pansariling pagsisikap; naghahanap ka lamang ng mga panlabas na dahilan, nang hindi nagpapakita ni katiting na pagsasaalang-alang sa Aking mga layunin. Napakasakit niyan sa Akin! Huwag kang magpatuloy nang ganyan! Maaari kayang hindi mo minamana ang mga pagpapalang ibinigay Ko sa iyo?

O Diyos! May pagkakautang sa Iyo ang Iyong anak. Hindi ko naseryoso ang Iyong gawain o isinaalang-alang ang Iyong mga layunin, ni hindi ako naging tapat sa Iyong mga panghihikayat. Nais ng Iyong anak na magbago. Nawa’y huwag Mo akong abandonahin, at nawa’y patuloy Mong isagawa ang Iyong gawain sa akin. O Diyos! Huwag Mong iwang mag-isa ang Iyong anak! Sa halip, mangyaring samahan Mo ako sa bawat saglit. O Diyos! Alam ng Iyong anak na mahal Mo ako, subalit hindi ko alam kung paano maarok ang Iyong mga layunin, magpakita ng pagsasaalang-alang para sa Iyong pasanin, o tuparin kung ano ang ipinagkatiwala Mo sa akin. Lalong hindi ko alam kung paano pastulan ang iglesia. Batid Mo na nalulungkot at nababagabag ako tungkol dito. O Diyos! Mangyaring gabayan Mo ako sa lahat ng oras. Ngayon ko lamang nadarama kung gaano kalaki ang aking pagkukulang—napakalaki ng aking pagkukulang! Hindi ko talaga mailarawan kung gaano. Nawa’y magpakita ng biyaya ang Iyong makapangyarihang kamay sa Iyong anak, suportahan Mo ako sa lahat ng oras, at tulutan Mo akong magpatirapa nang lubusan sa Iyong harapan, na hindi na gumagawa ng sarili kong mga pagpili at wala nang sarili kong mga iniisip o ideya. O Diyos! Alam Mo na nais ng Iyong anak na gawin ang lahat nang lubusan para sa Iyong kapakanan at para sa kapakanan ng kaharian ngayon. Alam Mo kung ano ang aking iniisip at kung ano ang aking ginagawa sa sandaling ito. O Diyos! Ikaw Mismo ang magsiyasat sa akin. Hinihiling ko lamang na samahan Mo ako sa paglalakbay at manatili Ka sa akin sa buhay sa lahat ng oras upang samahan ng Iyong kapangyarihan ang lahat ng aking ginagawa.