Sadyang hindi kayang maguni-guni ng mga tao ang lawak kung gaano na bumilis ang Aking hakbang: Ito ay isang kababalaghan na nangyari na hindi kayang isipin ng tao. Simula pa sa paglikha ng mundo, nagpatuloy na ang Aking bilis at hindi kailanman tumigil ang Aking gawain. Nagbabago araw-araw ang buong mundo ng sansinukob, at palaging nagbabago rin ang mga tao. Lahat ng ito’y bahagi ng Aking gawain, lahat ay bahagi ng Aking plano, at higit pa rito, kasama ang mga ito sa Aking pamamahala, at walang taong nakakaalam o nakakaunawa sa mga bagay na ito. Tanging kapag Ako Mismo ang nagsasabi sa inyo, tanging kapag harap-harapan Akong nakikipagbahaginan sa inyo, kayo nakakaalam nang kaunti; kung hindi, talagang walang sinumang makakaalam ng balangkas ng Aking plano ng pamamahala. Gayon ang Aking dakilang kapangyarihan, at higit pa rito, gayon ang Aking mga kamangha-manghang pagkilos. Mga bagay ito na walang makapagbabago. Kaya nga, kung ano ang sinasabi Ko ngayon ay nangyayari, at sadyang hindi magbabago. Sa mga kuru-kuro ng tao wala kahit katiting na kaalaman tungkol sa Akin—lahat ng ito ay walang katuturang usapan! Huwag mong isipin na sapat na sa iyo at nasisiyahan ka na. Sinasabi Ko ito sa iyo: Malayo pa ang lalakbayin mo! Sa kabuuan ng Aking plano ng pamamahala, kaunti lang ang alam ninyo, kaya dapat kayong makinig sa sinasabi Ko at gawin ang anumang sinasabi Ko sa inyong gawin. Kumilos kayo ayon sa Aking mga nais sa lahat ng bagay, at tiyak na magkakaroon kayo ng mga pagpapala Ko; makatatanggap ang sinumang naniniwala, samantalang sinumang hindi naniniwala ay magkakaroon ng “wala” na inisip nilang natupad sa kanila. Ito ang Aking katuwiran, at, higit pa rito, ito ang Aking kamahalan, Aking poot, at Aking pagkastigo. Walang kahit isang kaisipan o kilos mula sa bawat tao ang nakakalampas sa Akin.

Pagkarinig sa Aking mga salita, natatakot at nanginginig ang karamihan sa mga tao, at nagpapang-abot ang kanilang mga kilay. Nakagawa na ba Ako ng mali sa iyo? Maaari kayang ikaw ay hindi isa sa mga supling ng malaking pulang dragon? Nagkukunwari ka pang mabait! Nagkukunwari ka pa na Aking panganay na anak! Iniisip mo ba na bulag Ako? Iniisip mo ba na hindi Ko kayang kilatisin ang mga tao? Ako ang Diyos na nagsisiyasat sa kaloob-loobang bahagi ng puso ng mga tao: Ito ang sinasabi Ko sa Aking mga anak, at ang sinasabi Ko rin sa inyo, ang supling ng malaking pulang dragon. Malinaw Kong nakikita ang lahat, nang walang katiting na antas ng kamalian. Papaanong hindi Ko malalaman kung ano ang ginagawa Ko? Napakalinaw nito sa Akin! Bakit Ko sinasabi na Ako ang Diyos Mismo, ang Lumikha ng sansinukob at lahat ng bagay? Bakit Ko sinasabi na Ako ang Diyos na nag-oobserba sa kaloob-loobang bahagi ng puso ng mga tao? Lubos na nababatid Ko ang kalagayan ng bawat tao. Iniisip ba ninyo na hindi Ko nalalaman kung ano ang gagawin o kung ano ang sasabihin Ko? Hindi ninyo ito alalahanin. Mag-ingat kayo na hindi mahampas ng Aking kamay; sa gayo’y mawawalan kayo. Hindi mapagpatawad ang Aking mga atas administratibo. Nauunawaan ba ninyo? Lahat ng nabanggit sa itaas ay bahagi ng Aking mga atas administratibo. Mula sa araw na sinasabi Ko sa inyo ang mga ito, kung gagawa kayo ng anumang karagdagang paglabag, magkakaroon ng kagantihan, dahil hindi ninyo naunawaan noong una.

Ngayon pinagtitibay Ko ang Aking mga atas administratibo para sa inyo (nagkabisa simula ng araw ng pagpapatibay ng mga ito, na nagtatalaga ng iba’t ibang pagkastigo sa iba’t ibang tao):

Tinutupad Ko ang Aking mga pangako, at lahat ay nasa Aking mga kamay: Sinumang nagdududa ay tiyak na hahampasin. Walang lugar para sa anumang pagsasaalang-alang; kaagad silang lilipulin, sa ganito’y inaalis ang pagkamuhi mula sa Aking puso. (Mula rito ay kinukumpirma na ang sinumang hinahampas ay hindi dapat maging kasapi ng Aking kaharian, at tiyak na isang inapo ni Satanas.)

Bilang mga panganay na anak, dapat panatilihin ninyo ang inyong sariling posisyon at tuparin ang inyong sariling mga tungkulin, at huwag maging mapanghimasok. Dapat ihandog ninyo ang inyong mga sarili sa Aking plano ng pamamahala, at saan man kayo pumunta ay dapat kayong magpatotoo nang mabuti sa Akin at luwalhatiin ninyo ang Aking pangalan, hindi kayo dapat gumawa ng mga kahiya-hiyang kilos Dapat kayong maging mga halimbawa para sa lahat ng Aking mga anak at sa Aking mga tao; hindi kayo dapat maging mapagpalayaw kahit sa isang sandali, at dapat palagi kayong nagpapakita sa harap ng lahat nang may pagkakakilanlan ng mga panganay na anak; at hindi kayo dapat mag-asal-alipin, kundi humakbang pasulong nang nakataas-noo. Hinihingi Ko sa inyo na luwalhatiin ang Aking pangalan, hindi ipahiya ang pangalan Ko. Bawat isa sa mga panganay na anak ay mayroong kanyang sariling tungkulin, at hindi magagawa ang lahat ng bagay. Ito ang pananagutang ibinigay Ko na sa inyo, na hindi dapat inuurungan. Dapat ninyong ilaan ang inyong sarili nang buong puso, buong isipan, at buong lakas, sa pagtupad sa Aking ipinagkatiwala sa inyo.

Mula sa araw na ito, sa buong sansinukob, ang gampanin ng pagpapastol sa lahat ng Aking anak at Aking mga tao ay ipagkakatiwala sa Aking mga panganay na anak para tuparin. At kakastiguhin Ko ang sinumang hindi makakalaan ng kanilang buong puso at isipan sa pagtupad nito. Ito ang Aking katuwiran. Hindi Ko palalagpasin o pagagaanin ang parusa maging sa Aking mga panganay na anak.

Kung mayroong sinuman sa Aking mga anak o sa bayan Ko na tumutuya at umiinsulto sa isa sa Aking mga panganay na anak, malupit Ko silang parurusahan, dahil kinakatawan Ako ng Aking mga panganay na anak; anumang ginagawa ninuman sa kanila, ginagawa rin nila sa Akin. Ito ang pinakamahigpit sa Aking mga atas administratibo. Hahayaan Ko ang Aking mga panganay na anak na magsagawa ng Aking katuwiran ayon sa kanilang mga naisin laban sa sinuman sa Aking mga anak at Aking mga tao na lumalabag sa atas na ito.

Unti-unting aabandonahin Ko ang sinumang tumatrato sa Akin nang walang kabuluhan at tumutuon lang ang Aking pagkain, kasuotan, at pagtulog, inaasikaso lang ang Aking mga panlabas na gawain, at hindi nagbibigay-pansin sa pagpapakita ng pagsasaalang-alang para sa Aking pasanin, o sa pagtupad nang maayosg sa kanilang sariling mga tungkulin. Para ito sa lahat na may pandinig.

Sinumang nakakatapos sa pagseserbisyo sa Akin ay dapat masunuring umurong nang walang gulo. Mag-ingat ka, kung hindi ay pakikitunguhan kita. (Karagdagang atas ito.)

Dadamputin ng Aking mga panganay na anak ang tungkod na bakal simula ngayon at sisimulang ipatupad ang Aking awtoridad para pamahalaan ang di-mabilang na mga bayan at tao, lumakad sa gitna ng di-mabilang na mga bayan at tao, at isagawa ang Aking paghatol, katuwiran, at pagiging kapita-pitagan sa gitna ng di-mabilang na mga bayan at tao. Ang Aking mga anak at Aking bayan ay katatakutan Ako, pupurihin Ako, ipagbubunyi Ako, at bibigyan Ako ng kaluwalhatian nang walang humpay, dahil natutupad ang Aking plano ng pamamahala at makapaghaharing kasama Ko ang Aking mga panganay na anak.

Bahagi ito ng Aking mga atas administratibo; pagkatapos nito, sasabihin Ko sa inyo marami pa sa mga ito habang umuusad ang gawain. Mula sa mga atas administratibo sa itaas, dapat ninyong makita ang bilis kung paano Ko ginagawa ang Aking gawain, gayun din kung anong hakbang na ang naabot ng Aking gawain. Ang mga ito ang kumpirmasyon.

Matagal Ko nang hinatulan si Satanas. Dahil hindi nahahadlangan ang Aking kalooban at dahil nagtamo ng kaluwalhatian na kasama Ko ang Aking mga panganay na anak, naipatupad Ko na ang Aking katuwiran at pagiging kapita-pitagan sa mundo at sa lahat ng satanikong bagay. Hindi Ako nag-aangat ng daliri o nagbibigay-pansin kay Satanas sa anumang paraan (dahil ni hindi ito karapat-dapat na makipag-usap sa Akin). Patuloy Ko lang ginagawa kung ano ang nais Kong gawin. Nagpapatuloy nang maayos ang Aking gawain, paisa-isang hakbang, at hindi nahahadlangan ang Aking kalooban sa buong daigdig. Napahiya na sa isang antas si Satanas dahil dito, at lubusan nang nawasak ito, pero hindi pa rin nito natugunan ang Aking mga layunin. Pinapayagan Ko rin ang Aking mga panganay na anak na ipatupad ang Aking mga atas administratibo sa mga ito. Sa isang banda, ang hinahayaan Kong makita ni Satanas ay ang Aking poot na sumasapit dito; sa kabilang banda, hinahayaan Ko itong makita ang Aking kaluwalhatian (makita na ang Aking mga panganay na anak ang pinakamatutunog na mga saksi sa pagkapahiya ni Satanas). Hindi Ko personal na pinarurusahan ito; kundi hinahayaan Ko ang Aking mga panganay na anak na isagawa ang Aking katuwiran at pagiging kapita-pitagan. Dahil dati ay inaabuso ni Satanas ang Aking mga anak, inuusig ang Aking mga anak, at sinisiil ang Aking mga anak, ngayon, matapos ang serbisyo nito, pahihintulutan Ko ang Aking mga nasa hustong gulang na panganay na anak na tapusin ito. Si Satanas ay wala nang kapangyarihan at nahulog na. Ang pagkaparalisa ng lahat ng bansa sa mundo ang pinakamahusay na patotoo; malinaw na pagpapamalas ng pagbagsak ng kaharian ni Satanas ang paglalabanan ng mga tao at digmaan ng mga bansa. Ang dahilan kung bakit hindi Ako nagpakita ng anumang mga palatandaan at kababalaghan noon ay upang ipahiya si Satanas at luwalhatiin ang Aking pangalan, nang paunti-unti. Kapag ganap nang tinapos si Satanas, sisimulan Kong gamitin ang Aking dakilang kapangyarihan: Ang sinasabi Ko ay mangyayari, at ang mga sobrenatural na bagay na hindi nakaayon sa mga kuru-kuro ng tao ay matutupad din (tinutukoy nito ang mga pagpapalang parating sa lalong madaling panahon). Dahil Ako ang praktikal na Diyos Mismo at wala Akong anumang regulasyon, at dahil nagsasalita Ako ayon sa mga pagbabago sa Aking plano ng pamamahala, kung ano ang nasabi Ko na sa nakalipas ay hindi kinakailangang naaangkop sa kasalukuyan. Huwag ninyong panghawakan ang sarili ninyong mga kuru-kuro! Hindi Ako isang Diyos na sumusunod sa mga regulasyon; sa Akin, lahat ay malaya, nangingibabaw, at ganap na napawalan. Marahil ang mga sinabi kahapon ay hindi na napapanahon at isinasantabi ngayon (ngunit, ang Aking mga atas administratibo, mula noong pinagtibay ang mga ito, ay hindi kailanman magbabago). Ito ang mga hakbang sa Aking plano ng pamamahala. Huwag kumapit sa mga alituntunin. Araw-araw ay mayroong bagong liwanag at may mga bagong pahayag, at iyan ang plano Ko. Mabubunyag sa iyo araw-araw ang Aking liwanag at pakakawalan sa mundo ng sansinukob ang Aking tinig. Nauunawaan mo ba? Ito ang iyong tungkulin, ang pananagutang naipagkatiwala Ko sa iyo. Hindi mo ito dapat pabayaan kahit saglit. Gagamitin Ko hanggang sa huli ang mga taong itinuturing Kong karapat-dapat, hindi sila kailanman papalitan. Ito ay dahil Ako ang Diyos na makapangyarihan sa lahat, at alam Ko kung anong uri ng tao ang dapat gumawa ng kung anong bagay, at kung anong uri ng tao ang kayang gumawa ng kung anong bagay. Ito ang Aking pagkamakapangyarihan-sa-lahat.