Ang Makapangyarihang Diyos ay ang makapangyarihan sa lahat, nagsasakatuparan-ng-lahat, at ganap na tunay na Diyos! Hindi lamang Niya hawak ang pitong bituin, Siya ay nagtataglay ng pitong Espiritu, may pitong mata, binubuksan Niya ang pitong selyo, at binubuksan ang balumbon, ngunit higit pa riyan, pinamamahalaan Niya ang pitong salot at ang pitong mangkok, at inihahayag ang pitong kulog. Matagal na panahon na rin ang nakakalipas nang pinatunog Niya ang pitong trumpeta! Ang lahat ng bagay na nilikha Niya at ginawang ganap ay dapat na magbigay-papuri sa Kanya, bigyan Siya ng kaluwalhatian, at dakilain ang Kanyang trono. O, Makapangyarihang Diyos! Ikaw ang lahat. Naisakatuparan Mo na ang lahat, at sa Iyo, lahat ay ganap, maliwanag, napalaya, malaya, malakas, at makapangyarihan! Walang anumang natatago o nakukubli; sa Iyo, ang lahat ng hiwaga ay nasisiwalat. Higit pa rito, Iyong hinatulan ang napakaraming kaaway Mo, inihahayag Mo ang Iyong pagiging kapita-pitagan, ipinamamalas ang Iyong nanlalamong apoy, ipinakikita ang Iyong poot, at higit pa rito, ipinakikita Mo ang lahat ng Iyong walang katulad, walang hanggan, at walang katapusang kaluwalhatian! Dapat gumising ang di-mabilang na hinirang na mga tao ng Diyos at magbunyi at umawit nang walang pagpipigil, pinupuri ang maluwalhating tunay na Diyos na ito, na makapangyarihan sa lahat, ganap na tunay, laging buhay, masagana, at mula sa kawalang-hanggan hanggang sa kawalang-hanggan. Dapat patuloy na dakilain ang Kanyang trono, at patuloy na purihin at luwalhatiin ang Kanyang banal na pangalan. Ito ang Aking walang hanggang layunin—ng Diyos—at walang katapusang pagpapala na Kanyang ipinamamalas at ipinagkakaloob sa atin! Sino sa atin ang hindi nagmamana nito? Upang manahin ang pagpapala ng Diyos, dapat dakilain ang Kanyang banal na pangalan at lumapit upang pumalibot sa Kanyang trono sa pagsamba. Lahat ng humaharap sa Kanya na may ibang mga motibo at ibang mga intensiyon ay tutunawin ng Kanyang nanlalamong apoy. Ngayon ay ang araw na ang Kanyang mga kaaway ay hahatulan, at sa araw din na ito, sila ay masasawi. Higit pa rito, iyan din ang araw na Ako, ang Makapangyarihang Diyos, ay maipapamalas at dito Ko makakamit ang kaluwalhatian at karangalan. O, lahat ng tao! Mabilis na bumangon upang dakilain at malugod na tanggapin ang Makapangyarihang Diyos na mula pa sa simula hanggang sa magpakailanman ay naghahatid sa atin ng mapagmahal na kabaitan, nagkakaloob ng kaligtasan, nagkakaloob sa atin ng mga pagpapala, ginagawang ganap ang Kanyang mga anak, at isinasakatuparan ang Kanyang kaharian! Ito ang kamangha-manghang gawa ng Diyos! Ito ang walang hanggang paunang pagtatadhana at pagsasaayos ng Diyos—na Siya Mismo ay dumating upang iligtas tayo, upang gawin tayong ganap, at upang dalhin tayo sa kaluwalhatian.

Ang lahat ng hindi tumitindig at nagpapatotoo ay ang mga ninuno ng mga bulag at ang mga hari ng kahangalan. Sila ay magiging mga walang-hanggang hangal, mga walang-hanggang magulo ang isip, mga walang-hanggang bulag na patay. Dahil dito kaya dapat gumising ang ating mga espiritu! Dapat tumindig ang lahat ng hinirang na mga tao ng Diyos! Magbunyi, magbigay-papuri, at magbigay-pugay nang walang katapusan sa Hari ng kaluwalhatian, sa Ama ng awa, sa Anak ng pagtubos, sa masaganang pitong Espiritu, sa Makapangyarihang Diyos na nagdadala ng pagiging kapita-pitagan at nanlalamong apoy, katuwiran at paghatol, at Siyang lubos na sagana, sapat, hitik, makapangyarihan sa lahat, at ganap. Ang Kanyang trono ay dadakilain magpakailanman! Dapat makita ng lahat ng hinirang na mga tao ng Diyos na ito ang karunungan ng Diyos, ang Kanyang kamangha-manghang pamamaraan ng pagliligtas, at ang katuparan ng Kanyang maluwalhating kalooban. Kung mabibigo pa rin tayong tumindig at magpatotoo, sa sandaling lumipas na ang panahong ito, wala nang balikan. Kung magkakamit ba tayo ng mga pagpapala o makararanas ng kapahamakan ay pinagpapasyahan batay sa kung ano ang ating ginagawa, kung ano ang ating iniisip, at kung ano ang ating isinasabuhay sa panahong ito—sa bahaging ito ng paglalakbay. Paano kayo dapat kumilos? Magpatotoo sa Diyos at dakilain Siya magpakailanman; dakilain ang Makapangyarihang Diyos, si Cristo ng mga huling araw—ang walang-hanggang nag-iisang tunay na Diyos!

Mula ngayon, dapat ninyong makita nang malinaw na ang mga hindi nagpapatotoo sa Diyos—na hindi nagpapatotoo sa nag-iisang tunay na Diyos na ito—at ang mga nagkikimkim ng mga pagdududa tungkol sa Kanya, ay pawang mga may sakit, mga patay, at mga lumalaban sa Diyos! Napatunayan na ng mga salita ng Diyos mula pa noong unang panahon na ang lahat ng hindi nagtitipon kasama Ko ay nangangalat, at ang mga hindi kaayon Ko ay laban sa Akin—isa itong katotohanang hindi mapapasubalian at hindi nagbabago magpakailanman! Ang mga hindi nagpapatotoo sa Diyos ay mga alipin ni Satanas. Dumating ang mga taong ito upang guluhin at iligaw ang mga anak ng Diyos, at upang gambalain ang Kanyang pamamahala; dapat silang harapin gamit ang isang matalim na tabak! Ang sinumang nagpapakita ng kabaitan sa mga ito ay nagdadala ng pagkawasak sa kanyang sarili. Dapat ninyong pakinggan at paniwalaan ang mga salita ng Espiritu ng Diyos, tahakin ang landas ng Espiritu ng Diyos, at isabuhay ang mga salita ng Espiritu ng Diyos. Higit pa rito, dapat ninyong dakilain ang trono ng Diyos na makapangyarihan sa lahat hanggang sa katapusan ng panahon!

Ang Makapangyarihang Diyos ay ang Diyos ng pitong Espiritu! Ang may pitong mata at pitong bituin ay Siya rin; binubuksan Niya ang pitong selyo, at ang balumbon ay ganap na Niyang iniladlad! Pinatunog na Niya ang pitong trumpeta, at hawak Niya ang pitong mangkok at pitong salot, na ilalabas ayon sa Kanyang kalooban. O, ang pitong kulog na lagi nang nakaselyo! Dumating na ang panahon upang ihayag ang mga ito! Siya na naghahayag sa pitong kulog ay nagpakita na sa ating harapan!

Makapangyarihang Diyos! Sa Iyo, ang lahat ay napalaya at malaya; walang mga hirap, at ang lahat ay dumadaloy nang maayos! Walang nangangahas na humadlang o pumigil sa Iyo, at ang lahat ay nagpapasakop sa Iyo. Sinumang hindi nagpapasakop ay mamamatay!

Makapangyarihang Diyos, ang Diyos na may pitong mata! Lahat ay ganap na malinaw, lahat ay maliwanag at hindi nakakubli, at lahat ay naipamalas at nalantad. Sa Kanya, lahat ay may linaw ng kristal, at hindi lamang ang Diyos Mismo ang ganito, kundi ganito rin ang Kanyang mga anak. Walang isa mang tao, walang bagay, at walang anumang pangyayari ang maikukubli sa harap Niya at ng Kanyang mga anak!

Ang pitong bituin ng Makapangyarihang Diyos ay maliwanag! Ginawa Niyang perpekto ang iglesia; inoorden Niya ang Kanyang mga sugo ng iglesia, at ang buong iglesia ay nakapaloob sa Kanyang pagtutustos. Binubuksan Niya ang lahat ng pitong selyo, at Siya Mismo ang nagdudulot na maisakatuparan ang Kanyang plano ng pamamahala at ang Kanyang kalooban. Ang balumbon ay ang misteryosong wikang espirituwal ng Kanyang pamamahala, at Kanya na itong iniladlad at ipinamalas!

Dapat makinig ang lahat ng tao sa Kanyang pitong tumataginting na trumpeta. Sa Kanya, lahat ay nahahayag, hindi na kailanman muling ikukubli, at wala nang dalamhati. Lahat ay naipapamalas at lahat ay matagumpay!

Bukas, maluwalhati, at matagumpay na mga trumpeta ang pitong trumpeta ng Makapangyarihang Diyos! Ang mga ito rin ang mga trumpeta na humahatol sa Kanyang mga kaaway! Sa gitna ng Kanyang tagumpay, ang Kanyang tambuli ay dinadakila! Kanyang pinaghaharian ang buong sansinukob!

Inihanda na Niya ang pitong mangkok ng mga salot, pinuntirya na ang Kanyang mga kaaway, at ibinubuhos ang mga ito nang buo, hanggang sa pinakasukdulang antas, at ang mga kaaway na iyon ay lalamunin ng Kanyang nanlalamong apoy. Ipinapakita ng awtoridad ng Makapangyarihang Diyos ang lakas nito, at ang Kanyang mga kaaway ay pawang nalilipol. Hindi na seselyuhan sa harap ng Makapangyarihang Diyos ang pangwakas na pitong kulog; lahat ng iyon ay nahayag! Lahat ng ito ay nahayag! Hinahampas Niya ang Kanyang mga kaaway gamit ang pitong kulog, pinatitibay ang mundo at ito ay pinagseserbisyo Niya sa Kanya, at hindi na kailanman magiging mapanglaw!

Ang matuwid na Makapangyarihang Diyos! Dinadakila Ka namin magpakailanman! Karapat-dapat Ka sa walang katapusang papuri, at walang katapusang pagpupugay at pagdakila! Hindi lamang gagamitin para sa Iyong paghatol ang Iyong pitong kulog, ngunit higit na gagamitin ito para sa Iyong kaluwalhatian at awtoridad, upang maisakatuparan ang lahat ng bagay!

Nagdiriwang ang di-mabilang na hinirang na mga tao ng Diyos sa harap ng trono, dinadakila at pinupuri ang Makapangyarihang Diyos, ang Cristo ng mga huling araw! Niyayanig ng kanilang mga tinig na parang kulog ang buong sansinukob! Walang pasubaling umiiral ang lahat ng bagay dahil sa Kanya, at lumilitaw dahil sa Kanya. Sino ang nangangahas na hindi ganap na iugnay sa Kanya ang lahat ng kaluwalhatian, karangalan, awtoridad, karunungan, kabanalan, tagumpay, at mga pagpapamalas? Ito ang katuparan ng Kanyang kalooban, at ito ang huling kaganapan ng pagbubuo ng Kanyang pamamahala!